સાતમા પગાર પંચ મુજબ DA અને DRમાં વર્ષમાં બે વખત વધારવામાં આવે છે. પહેલી વાર મોંઘવારી ભથ્થું અને રાહત જાન્યુઆરીમાં વધારવામાં આવે છે અને બીજી વાર જુલાઇમાં થાય છે.

કેન્દ્ર સરકારના લાખો કર્મચારીઓનો પગાર ટૂંક સમયમાં ફરી વધી શકે છે. આ સાથે કેન્દ્ર સરકારના પેન્શનરોને પણ દર મહિને વધુ પૈસા મળી શકે છે. વડાપ્રધાન નરેન્દ્ર મોદીની આગેવાની હેઠળની કેન્દ્ર સરકાર  ફરી એકવાર જુલાઈમાં મોંઘવારી ભથ્થા અને મોંઘવારી રાહત વધારવા પર વિચાર કરી રહી છે.

સરકારે આ વર્ષે માર્ચમાં DA અને DRમાં 4 ટકાનો વધારો કર્યો છે. વધેલા દરો 1 જાન્યુઆરી, 2023થી અમલમાં આવ્યા છે. હવે ફરીથી ડીએ અને ડીઆર વધારવાની અટકળો છે. જો આમ થશે તો કેન્દ્ર સરકારના લગભગ 50 લાખ કર્મચારીઓનો પગાર ફરી એકવાર વધી જશે. આ ઉપરાંત કેન્દ્ર સરકારના લાખો પેન્શનધારકોને પણ વધુ પૈસા મળવા લાગશે.

7મા પગારપંચ મુજબ DA અને DRમાં વર્ષમાં બે વખત વધારવામાં આવે છે. પહેલી વાર મોંઘવારી ભથ્થું અને રાહત જાન્યુઆરીમાં વધારવામાં આવે છે અને બીજી વાર જુલાઇમાં થાય છે. સરકાર આ નિર્ણય અખિલ ભારતીય સીપીઆઈ ડેટા એટલે કે એઆઈસીપીઆઈ ઈન્ડેક્સ (ઓલ ઈન્ડિયા કન્ઝ્યુમર પ્રાઇસ ઈન્ડેક્સ)ના આધારે લે છે. તેના આંકડા શ્રમ અને રોજગાર મંત્રાલય હેઠળના શ્રમ બ્યુરો દ્વારા જારી કરવામાં આવે છે. સરકારી કર્મચારીઓ અને પેન્શનરોને ફુગાવાથી બચાવવા માટે તેમના પગાર/પેન્શનમાં DA/DR ઘટક ઉમેરવામાં આવ્યું છે.

લેબર બ્યુરોની અખબારી યાદી મુજબ, AICPI ઇન્ડેક્સ ફેબ્રુઆરી મહિનામાં 0.1 પોઈન્ટ ઘટીને 132.7 પર રહ્યો. જાન્યુઆરીમાં આ ઈન્ડેક્સ 132.8 પોઈન્ટ પર હતો. માર્ચ મહિના દરમિયાન આ આંકડો 0.6 પોઈન્ટ વધીને 133.3 પોઈન્ટ પર પહોંચ્યો હતો. જે એક મહિના પહેલા એટલે કે ફેબ્રુઆરી 2023 કરતા 0.45 ટકા અને એક વર્ષ પહેલા એટલે કે માર્ચ 2022 કરતા 0.80 ટકા વધુ છે. આવી સ્થિતિમાં ફરી એકવાર મોંઘવારી ભથ્થા અને રાહત વધારવાની અટકળો લગાવવામાં આવી રહી છે. કેન્દ્ર સરકાર 1 જુલાઈથી DA અને DRમાં 3 ટકાનો વધારો કરી શકે છે.

કોરોના રોગચાળાને કારણે ડીએમાં સુધારો વચ્ચે થોડા સમય માટે રોકી દેવામાં આવ્યો હતો. લગભગ દોઢ વર્ષના અંતરાલ પછી, કેન્દ્ર સરકારે જુલાઈ 2021 માં DA અને DR 17 ટકાથી વધારીને 28 ટકા કર્યો હતો. આ પછી ઓક્ટોબર 2021માં તેને 28 ટકાથી વધારીને 31 ટકા કરવામાં આવ્યો હતો. તે પછી ડીએ અને ડીઆરના દરોમાં સતત વધારો થતો રહ્યો અને હવે તે 42 ટકા છે. જો જુલાઈમાં 3 ટકાના વધારાનો અંદાજ સાચો નીકળે તો DA અને DRનો અસરકારક દર વધીને 45 ટકા થઈ જશે.