તમે દુનિયાભરમાં અનેક દેવી-દેવતાઓના મંદિરો જોયા હશે, પરંતુ શું તમે ક્યારેય ડિવોર્સ ટેમ્પલ એટલે કે છૂટાછેડા માટેના મંદિર વિશે સાંભળ્યું છે. આ નામ સાંભળીને તમે વિચારતા જ હશો કે આખરે આ કેવું મંદિર છે. આ મંદિર જાપાનમાં આવેલું છે, જેની સ્થાપના લગભગ 600 વર્ષ પહેલા માત્સુગાઓકા ટોકેઈ-જીના નામથી કરવામાં આવી હતી. મળતી માહિતી મુજબ ઘરેલુ હિંસાનો ભોગ બનેલી મહિલાઓ અહીં આવે છે.

જાપાનનું આ મંદિર કાનાગાવા પ્રીફેક્ચરના કામાકુરા શહેરમાં આવેલું છે, જે ટેકઓજી મંદિર તરીકે પણ ઓળખાય છે. આ ઐતિહાસિક બૌદ્ધ મંદિર એ સમયનું છે જ્યારે સ્ત્રીઓને પોતાનો કોઈ અધિકાર નહોતો અને જાપાનમાં છૂટાછેડાની કોઈ જોગવાઈ નહોતી.

જ્યારે જાપાનમાં મહિલાઓ તેમના પતિને છોડીને જતી હતી ત્યારે તેઓ આ મંદિરમાં આશરો મેળવતા હતા. આ મંદિરની સ્થાપના 1285માં બૌદ્ધ સાધ્વી કાકુસન શિદો-ની દ્વારા કરવામાં આવી હતી. તે સમય દરમિયાન (1185 અને 1333 વચ્ચે), જાપાનમાં મહિલાઓ માટે મર્યાદિત કાનૂની અધિકારો અને ઘણા સામાજિક પ્રતિબંધો હતા.

જ્યારે પોતાના પતિથી નાખુશ મહિલાઓ અહીં આવીને રહેવા લાગી ત્યારે ધીમે ધીમે આ મંદિર પણ એક સુરક્ષિત આશ્રયસ્થાન તરીકે જોવામાં આવ્યું. મહિલાઓની સંસ્થા તરીકે લોકપ્રિય બનેલું આ મંદિર આજે પણ એટલું જ પ્રખ્યાત છે.
​​​​​​​

પાછળથી, ટોકોજીએ મહિલાઓને સત્તાવાર રીતે તલાક પ્રમાણપત્ર આપવાનું શરૂ કર્યું, જેનું પ્રમાણપત્ર સુફુકુ-જી તરીકે ઓળખાય છે. આ સર્ટિફિકેટમાં લગ્ન સંબંધિત કાયદાકીય સ્વતંત્રતા વિશે જણાવવામાં આવ્યું છે.

ધીરે ધીરે, લોકો મંદિરને કાકેકોમી-ડેરા, બ્રેક-અપનું મંદિર, મહિલા મંદિર અથવા છૂટાછેડા મંદિર કહેવા લાગ્યા. મંદિર અંદરથી સુંદર બગીચાઓ અને સુંદર સ્થાપત્યથી ઘેરાયેલું છે. અને આજે પણ તલાક લેનારી મહિલાઓ અહી આવે છે.