મણિપુર હિંસા, દિલ્હી પર કેન્દ્રનો વટહુકમ, મોંઘવારી સહિતના દેશના મહત્વના મુદ્દાઓ પર ચર્ચા

આજથી સંસદનું ચોમાસું સત્ર શરૂ થઈ રહ્યું છે. આ સત્રમાં પણ સંસદના બંને ગૃહોમાં હંગામો થવાની સંભાવના છે. આનું કારણ મણિપુરમાં ચાલી રહેલી હિંસા, દિલ્હી પર કેન્દ્રનો વટહુકમ અને દેશની અંદર અન્ય ઘણા મુદ્દાઓને જવાબદાર માનવામાં આવી રહ્યો છે.

સંસદના ચોમાસુ સત્રને સુચારૂ રીતે ચલાવવા માટે ગઈકાલે બિઝનેસ એડવાઈઝરી કમિટીની બેઠક યોજાઈ હતી અને ત્યારબાદ ઓલ પાર્ટી મીટિંગ અને એનડીએ ફ્લોર લીડર્સની મીટિંગ થઈ હતી. સર્વપક્ષીય બેઠકમાં તમામ પક્ષોના પ્રતિનિધિઓએ પોતપોતાના મુદ્દાઓ સરકાર સમક્ષ મૂક્યા હતા. આ દરમિયાન વિપક્ષ દ્વારા મણિપુર હિંસા, મોંઘવારી અને દિલ્હી વટહુકમનો મુદ્દો ઉઠાવવામાં આવ્યો હતો. વિપક્ષની આ માંગણીઓ પર સંસદીય કાર્ય મંત્રી પ્રહલાદ જોશીએ કહ્યું કે સરકાર ઇચ્છે છે કે ગૃહ સુચારુ રીતે ચાલે. તે કોઈપણ મુદ્દા પર ચર્ચા કરવા તૈયાર છે

પ્રહલાદ જોશીએ બેઠક બાદ પત્રકારોને જણાવ્યું કે અમે રક્ષા મંત્રી રાજનાથ સિંહની અધ્યક્ષતામાં સર્વપક્ષીય બેઠક બોલાવી હતી, જેમાં 34 પક્ષોના 44 નેતાઓએ ભાગ લીધો હતો. તેમણે કહ્યું કે તેમાં કેટલાક મહત્વપૂર્ણ સૂચનો આવ્યા છે. આ સૂચનો વિરોધ પક્ષો તેમજ સહયોગી પક્ષો તરફથી આવ્યા હતા.

સંસદીય બાબતોના મંત્રીએ કહ્યું, કે સર્વપક્ષીય બેઠકમાં કોંગ્રેસ સહિત વિવિધ વિપક્ષી દળોએ પણ મણિપુરની સ્થિતિનો મુદ્દો ઉઠાવ્યો અને સરકાર સાથે ચર્ચાની માંગ કરી. જ્યારે પણ લોકસભાના અધ્યક્ષ અને રાજ્યસભાના અધ્યક્ષ સમય નક્કી કરે ત્યારે અમે ચર્ચા કરવા તૈયાર છીએ. જે પણ મુદ્દા હશે, અમે નિયમો અને પ્રક્રિયાઓ હેઠળ ચર્ચા કરવા તૈયાર છીએ.

સુત્રોના જણાવ્યા મુજબ ચોમાસુ સત્ર દરમિયાન સરકાર પાસે 31 વિધાન વિષયો છે. તેમાં દિલ્હી નેશનલ કેપિટલ ટેરિટરી ગવર્નમેન્ટ એમેન્ડમેન્ટ બિલ 2023 સામેલ છે. આ સિવાય પોસ્ટલ સર્વિસ બિલ 2023, ડિજિટલ પર્સનલ ડેટા પ્રોટેક્શન બિલ 2023, પ્રાચીન સ્મારકો અને પુરાતત્વીય સ્થળો અને જરૂરી સુધારા બિલ 2023, ઇન્ટરનેશનલ મોનેટરી ફંડ અને બેંક બિલ 2023 પણ આ યાદીમાં સામેલ છે.

આ સત્ર દરમિયાન બાયોડાયવર્સિટી એમેન્ડમેન્ટ બિલ 2022 અને મલ્ટી સ્ટેટ કોઓપરેટિવ સોસાયટી એમેન્ડમેન્ટ બિલ 2022 ચર્ચા અને પસાર કરવા માટે રજૂ કરી શકાય છે.ઉલ્લેખનીય છે કે ચોમાસુ સત્ર એવા સમયે યોજાઈ રહ્યું છે જ્યારે એક દિવસ પહેલા જ 26 વિપક્ષી પાર્ટીઓએ ઈન્ડિયન નેશનલ ડેવલપમેન્ટ ઈન્ક્લુઝિવ એલાયન્સ (INDIA) ની રચના કરી છે

આવી સ્થિતિમાં સંસદના આ સત્ર દરમિયાન દિલ્હી નેશનલ કેપિટલ ટેરિટરી ગવર્નમેન્ટ એમેન્ડમેન્ટ ઓર્ડિનન્સ અને તેનાથી સંબંધિત બિલનો મુદ્દો મુખ્ય રીતે સામે આવશે, જેના પર સરકાર અને વિપક્ષ વચ્ચે વિવાદ થવાની સંભાવના છે. અરવિંદ કેજરીવાલની આગેવાની વાળી આમ આદમી પાર્ટી (AAP) દિલ્હીમાં અમલદારોની નિમણૂક અને ટ્રાન્સફર અંગેના વટહુકમનો વિરોધ કરી રહી છે, જે કેન્દ્ર સરકાર દ્વારા મે મહિનામાં બહાર પાડવામાં આવ્યો હતો.

ચોમાસું સત્ર શરૂ થશે જૂની બિલ્ડિંગમાં, પૂરું થશે નવી બિલ્ડિંગમાં

સંસદનું ચોમાસુ સત્ર આજથી શરૂ થશે અને 11 ઓગસ્ટ સુધી ચાલશે. સંસદીય કાર્ય મંત્રી પ્રહલાદ જોશીએ ટ્વીટ કરીને આ જાણકારી આપી. તેમણે કહ્યું કે. તમામ પક્ષોને ચોમાસુ સત્ર દરમિયાન વિધાનસભાના કામ અને અન્ય વિષયો પર અર્થપૂર્ણ ચર્ચામાં યોગદાન આપવા આગ્રહ કરું છું .તેમણે અન્ય એક ટ્વિટમાં કહ્યું કે ચોમાસુ સત્ર 23 દિવસ ચાલશે અને તેમાં 17 બેઠકો હશે. તે જ સમયે, સંસદના સૂત્રો દ્વારા જણાવવામાં આવ્યું હતું કે સંસદ જૂની ઇમારતથી કામકાજ શરૂ કરી શકે છે અને પછીથી તે નવા બિલ્ડિંગમાં જશે. સંસદની નવી ઇમારતનું ઉદ્ઘાટન 28 મેના રોજ વડાપ્રધાન નરેન્દ્ર મોદીએ કર્યું હતું.