પેરિસ ઓલિમ્પિક 2024માં ભારતને પ્રથમ મેડલ અપાવનાર મહિલા શૂટર મનુ ભાકર 7 ઓગસ્ટ, બુધવારની સવારે ભારત પરત આવી છે. દિલ્હીના ઈન્દિરા ગાંધી ઈન્ટરનેશનલ એરપોર્ટ પર મનુ ભાકરનું ભવ્ય સ્વાગત કરવામાં આવ્યું હતું.

એરપોર્ટ પર મનુની એક ઝલક મેળવવા ચાહકો ઉત્સુક હતા અને ઢોલ વગાડી તેમનું સ્વાગત કરવામાં આવ્યું હતું. જણાવી દઈએ કે, મનુ ભાકરે શૂટિંગમાં ભારતના 12 વર્ષના ઈંતજારનો અંત લાવ્યો અને પેરિસ ઓલિમ્પિકમાં બે બ્રોન્ઝ મેડલ જીત્યા. સૌથી પહેલા તેણે 10 મીટર એર પિસ્તોલ ઈવેન્ટમાં બ્રોન્ઝ મેડલ જીત્યો હતો. આ બાદ તેણે 10 મીટર ટીમ એર પિસ્તોલ સ્પર્ધામાં સરબજોત સિંહ સાથે બીજો બ્રોન્ઝ મેડલ જીત્યો. આ દરમિયાન તેણે ઈતિહાસ પણ રચ્યો છે. તે એક જ ઓલિમ્પિકમાં બે મેડલ જીતનારી ભારતની પ્રથમ મહિલા શૂટર બની હતી.

ઓલિમ્પિક ડબલ મેડલ વિજેતા મનુ ભાકરનું ભવ્ય સ્વાગત

વાસ્તવમાં પેરિસ ઓલિમ્પિક 2024માં ડબલ મેડલ જીતનાર મનુ ભાકરનું દિલ્હી એરપોર્ટ પર ભવ્ય સ્વાગત કરવામાં આવ્યું હતું. ભારતીય સ્ટાર મહિલા શૂટર પર ફૂલોની વર્ષા કરવામાં આવી હતી અને વિજયના માળા પહેરાવવામાં આવી હતી. મનુ ભાકરના માતા-પિતા પણ તેમની પુત્રીના સ્વાગત માટે દિલ્હી એરપોર્ટ પર હાજર હતા. આ સાથે જ મનુના કોચ જસપાલ રાણાનું પણ ભવ્ય સ્વાગત કરવામાં આવ્યું હતું.