વડાપ્રધાન નરેન્દ્ર મોદીના ખાસ કાર્યક્રમ મન કી બાતનો 105મો એપિસોડ આજે રિલીઝ કરવામાં આવ્યો હતો. જેમાં તેમણે દેશવાસીઓ સાથે વડાપ્રધાને G20 સમિટ, ચંદ્રયાન-3ની સફળતા અને ભારતના અને યુરોપ વચ્ચે શિપિંગ કોરિડોર પરના કરાર અંગે ચર્ચા કરી હતી. તેમણે ચંદ્રયાન-3ની સફળતા સાથે પોતાની મન કી બાત પણ શરૂ કરી હતી. 

​​​​​​​

આ દરમિયાન વડાપ્રધાન મોદીએ જર્મનીની એક યુવતીનો ઉલ્લેખ કર્યો હતો, તેમણે કહ્યું કે 21 વર્ષીય કાસમી આ દિવસોમાં ઈન્સ્ટાગ્રામ પર ખૂબ જ લોકપ્રિય છે. જર્મનીના રહેવાસી કાસમી ક્યારેય ભારત આવ્યા નથી, પરંતુ તેઓ ભારતીય સંગીતના ચાહક છે. જેમણે ક્યારેય ભારત જોયું પણ નથી, ભારતીય સંગીતમાં તેમનો રસ ખૂબ જ પ્રોત્સાહક છે. પીએમે કહ્યું કે કાસમી બાળપણથી જોઈ શકાતા નથી, પરંતુ તેમણે પડકારોનો સામનો કરીને અસાધારણ સિદ્ધિઓ હાંસલ કરી છે. ભારતીય સંગીતમાં તેમનો પરિચય પાંચ-છ વર્ષ પહેલાં જ થયો હતો. આ ઉપરાંત કાસમીએ તબલા વગાડતા પણ શીખ્યા છે. મન કી બાત દરમિયાન તેમણે કાસમીના બે વિડીયો પણ શેર કર્યા હતા, જેમાંથી એક સંસ્કૃત શ્લોકનો હતો અને બીજો તમિલ ભાષાના કોઈ ગીતનો વિડીયો હતો.

વડાપ્રધાને કહ્યું કે હૈદરાબાદમાં પુસ્તકાલયને લગતા આવા જ એક અનોખા પ્રયાસ વિશે મને ખબર પડી છે. અહીં સાતમા ધોરણમાં ભણતી દીકરી આકર્ષણા સતીષએ અજાયબી કરી બતાવી છે. તમને જાણીને નવાઈ લાગશે કે માત્ર 11 વર્ષની ઉંમરમાં તે બાળકો માટે એક કે બે નહીં પરંતુ સાત પુસ્તકાલયો ચલાવી રહી છે. તેણે કહ્યું કે આકર્ષણાને આની પ્રેરણા ત્યારે મળી જ્યારે તે બે વર્ષ પહેલા તેના પિતા સાથે કેન્સર હોસ્પિટલમાં ગઈ હતી ત્યાં બાળકોને મળી તેને આ પ્રકારની સેવા કરવાનો વિચાર આવ્યો હતો.

આ ઉપરાંત PM એ કહ્યું કે G20 માં જ્યારે વિશ્વભરના નેતાઓ બાપુને શ્રદ્ધાંજલિ આપવા માટે રાજઘાટ પહોંચ્યા ત્યારે દેશ એ દ્રશ્ય ભૂલી શકતો નથી. પીએમ મોદીએ કહ્યું કે રાજઘાટ પર નેતાઓનું એકસાથે પહોંચવું એ વાતનો પુરાવો છે કે બાપુના વિચારો આજે પણ દુનિયાભરમાં કેટલા પ્રાસંગિક છે. પીએમે એ વાત પર ખુશી વ્યક્ત કરી કે ગાંધી જયંતિ પર દેશભરમાં સ્વચ્છતા સંબંધિત ઘણું બધું આયોજન કરવામાં આવ્યું છે. પીએમે કહ્યું કે 1 ઓક્ટોબરે સવારે 10 વાગ્યે સ્વચ્છતા પર એક મોટો કાર્યક્રમ યોજાવા જઈ રહ્યો છે. તેમણે દેશભરના લોકોને આ કાર્યક્રમમાં ભાગ લેવાની અપીલ કરી હતી.

વડાપ્રધાને વિશ્વ પ્રવાસન દિવસ પર પણ આજે વાત કરી હતી. તેમણે કહ્યું કે કેટલાક લોકો વિશ્વ પ્રવાસન દિવસ પર્યટનને માત્ર ફરવા જવાની બાબત તરીકે જુએ છે પણ તે રોજગાર સાથે પણ સંબંધિત છે. પ્રવાસન ક્ષેત્ર મહત્તમ રોજગારીનું સર્જન કરે છે. છેલ્લા કેટલાક વર્ષોમાં વિશ્વના લોકોનું ભારત તરફનું આકર્ષણ વધ્યું છે. પીએમએ સલાહ આપી કે હવે તમે ક્યાંક જાઓ તો ભારતની વિવિધતા જુઓ અને સમજો. વડા પ્રધાને કર્ણાટકના મંદિરોનો પણ ઉલ્લેખ કર્યો જેને તાજેતરમાં યુનેસ્કો વર્લ્ડ હેરિટેજ સાઇટનો દરજ્જો આપવામાં આવ્યો છે. વડાપ્રધાને કહ્યું કે કર્ણાટકના હોયસડા મંદિરોને વિશ્વ ધરોહરની યાદીમાં સામેલ કરવાનો ઘણો મોટો ફાયદો છે. પીએમએ કહ્યું કે આ મંદિરો 13મી સદીમાં બનાવવામાં આવ્યા હતા. હવે ભારતમાં યુનેસ્કો વર્લ્ડ હેરિટેજની સંખ્યા વધીને 42 થઈ ગઈ છે.