ખતરનાક અને જીવલેણ ચાઇનીઝ દોરીના વેચાણ સામે પ્રતિબંધ હોવાછતાં કેટલાક લાલચુ વેપારીઓ કમાઇ લેવાની લ્હાયમાં આ જોખમી દોરીનું વેચાણ કરી રહ્યા છે.ત્યારે પોલીસે તેની સામે કડક કાર્યવાહી કરી આવી દોરીનું વેચાણ કરનારને ઝડપી રહી છે.પોલીસે જામકંડોરણા અને ગોંડલમાં ચાઇનીઝ દોરીનું વેચાણ કરનાર વેપારીને ઝડપી લઇ તેની સામે કાયદેસરની કાર્યવાહી કરી છે.


જામકંડોરણા પોલીસે અહીંના ખોડીયાર ચોક પાસે આવેલા શ્રીજી ટ્રેડર્સ નામની દુકાનની બાજુમાં સ્ટોલમાં ચાઇનીઝ દોરીનું વેચાણ કરનાર નિરવ ઉર્ફે ભુરો હરીશભાઇ આડતીયા(ઉ.વ ૩૨ રહે. જામકંડોરણા) ને ઝડપી લઇ અહીંથી ચાઇનીઝ દોરીની પાંચ ફિરકી કબજે કરી કાયદેસરની કાર્યવાહી કરી હતી. જયારે ગોંડલ સિટી પોલીસ મથકના સ્ટાફે અહીં જેલ ચોક હીમાલયા સોડાની બાજુમાં જે.કે.સેન્ડવીચ સિઝન સ્ટોર નામની દુકાનમાં તપાસ કરતા અહીંથી ચાઇનીઝ દોરીની ૯ ફિરકી મળી આવી હતી.જેથી પોલીસે દુકાનદાર મુકેશ ભયલાભાઇ રાજા(ઉ.વ ૫૫ રહે.ઉંબાવાળા ફાટક ચોકસીનગર ગોંડલ) સામે જાહેરનામા ભંગ અંગેનો ગુનો નોંધી કાયદેસરની કાર્યવાહી કરી હતી.