રાજકોટમાં અવધ રોડ પર સિઝન હોટલ પાસે આવેલા નિવર્ણિા ટાવર સોસાયટીમાં કરૂણ ઘટના બની હતી. અહીં બેઝમેન્ટમાં નેપાળી દંપતીની બે વર્ષની બાળકી રમતા રમતા ગેટ પાસે આવેલા ફુવારામાં પડી જતા બેભાન થઈ ગઈ હતી. બાદમાં તેને સારવાર માટે હોસ્પિટલ લઈ જતા અહીં સારવાર કારગત નિવડે તે પૂર્વે માસુમે આંખો મીંચી લીધી હતી. બાળકીના માતા-પિતા અહીં એપાર્ટમેન્ટમાં જ કામ કરતા હોય તેઓ તેના કામમાં વ્યસ્ત હતા દરમિયાન બાળકી અકસ્માતે ફુવારામાં પડી ગઈ હતી. એકની એક પુત્રીના મોતથી નેપાળી દંપતિ આઘાતમાં સરી પડ્યું હતું.
બનાવની જાણવા મળતી વિગતો મુજબ, અવધ રોડ પર સીઝન હોટલ પાસે આવેલા નિવર્ણિા ટાવર સોસાયટીમાં રહેતા મૂળ નેપાળના વતની શેરસિંહ ગુહા અને તેના પત્ની બંને અહીં ગઈકાલ બપોરના એપાર્ટમેન્ટમાં બેઝમેન્ટમાં કામમાં વ્યસ્ત થતા દરમિયાન તેમની બે વર્ષની બાળકી પ્રિયાંશી અહીં સોસાયટીના એન્ટ્રી ગેટ પાસે રમતા રમતા ત્રણ ફૂટ ઊંડા ફુવારામાં પડી ગઈ હતી. બાળકી ક્યાંય નજરે ન પડતા તેના માતા-પિતા તેની શોધખોળ કરતા હતા દરમિયાન બાળકી અહીં ફુવારામાંથી મળી આવી હતી જેથી તેને બેભાન હાલતમાં સારવાર માટે જનાના હોસ્પિટલ ખસેડવામાં આવી હતી. અહીં ફરજ પરના તબીબે જોઈ તપાસી બાળકીને મૃત જાહેર કરી હતી. બનાવની જાણ થતા યુનિવર્સિટી પોલીસ મથકના એએસઆઈ એચ.પી.રવીયાએ અહીં પહોંચી જરૂરી કાર્યવાહી કરી હતી.
બનાવની વધુમાં જાણવા મળતી વિગતો મુજબ, દંપતિ મૂળ નેપાળનું વતની હોય છેલ્લા પાંચેક વર્ષથી રાજકોટમાં રહે છે અને છેલ્લા ત્રણ વર્ષથી અહીં નિવર્ણિા ટાવરમાં સોસાયટીમાં રહે છે. બાળકીના પિતા શેરસિંગ અહીં એપાર્ટમેન્ટમાં સિક્યુરિટી તરીકેનું કામ કરે છે જ્યારે તેની માતા અહીં ઘરકામ કરે છે. ગઈકાલે માતા-પિતા બંને બેઝમેન્ટમાં પોતપોતાના કામમાં વ્યસ્ત હતા દરમિયાન બાળકી રમતા રમતા અકસ્માતે ફુવારામાં પડી ગઈ હતી એકની એક પુત્રીના મોતથી માતા-પિતા આઘાતમાં સરી પડ્યા હતા.