પીએમ મોદીની બંગાળમાં મોટી જાહેરાત, પશ્ચિમ બંગાળમાં ઇડીએ 3000 કરોડ રૂપિયા કર્યા જપ્ત : કૃષ્ણનગર લોકસભા મતવિસ્તારના ઉમેદવાર અમૃતા રોય સાથે વડાપ્રધાને કરી વાતચીત

વડા પ્રધાન નરેન્દ્ર મોદી પશ્ચિમ બંગાળમાં ગરીબો પાસેથી 'લૂંટાયેલા' અને એન્ફોર્સમેન્ટ ડિરેક્ટોરેટ (ઇડી) દ્વારા જપ્ત કરાયેલા નાણાં લોકોને પરત કરવા માટે કામ કરી રહ્યા છે. પીએમ મોદીએ કૃષ્ણનગર લોકસભા મતવિસ્તારમાં તૃણમૂલ કોંગ્રેસના મહુઆ મોઇત્રા સામે પક્ષના ઉમેદવાર અને અગાઉના રાજવી પરિવારના સભ્ય અમૃતા રોય સાથે ટેલિફોનિક વાતચીતમાં આ વાત કહી છે.

પીએમ મોદીએ રાજમાતા સાથે વાતચીતમાં કહ્યું, હું કાયદાકીય સલાહ લઈ રહ્યો છું. ઇડીએ પશ્ચિમ બંગાળમાં 3000 કરોડ રૂપિયા જપ્ત કર્યા છે, આ ગરીબોના પૈસા છે. કોઈએ શિક્ષક બનવા માટે પૈસા ચૂકવ્યા, તો કોઈએ કારકુન બનવા માટે પૈસા ચૂકવ્યા. હું કાનૂની સલાહ લઈ રહ્યો છું. મારી ઈચ્છા છે કે નવી સરકાર બનતાની સાથે જ કાયદાકીય જોગવાઈઓ કરવી પડશે, નિયમો બનાવવા પડશે, હું ગરીબ લોકોને આ 3000 કરોડ રૂપિયા પરત કરવા માંગુ છું. બંગાળની જનતા વિશ્વાસ કરે કે ઇડીએ જે 3000 કરોડ રૂપિયા જપ્ત કર્યા છે તેને પરત કરવાનો હું કોઈને કોઈ રસ્તો શોધી લઈશ.

વડા પ્રધાન અને રોય વચ્ચેની વાતચીતની વિગતો આપતા, પક્ષના નેતાઓએ જણાવ્યું હતું કે વડા પ્રધાનનો અંદાજ છે કે રાજ્યમાં નોકરીઓ મેળવવા માટે લાંચ તરીકે આપવામાં આવેલી રકમ લગભગ 3,000 કરોડ રૂપિયા હતી. મોદીએ રોયને તેના વિશે લોકોને જણાવવા કહ્યું છે. તેમણે કહ્યું કે સત્તામાં પાછા ફર્યા બાદ તરત જ તેઓ લોકોના પૈસા પાછા આપવાનો રસ્તો શોધી લેશે. વડાપ્રધાને કહ્યું કે જો જરૂર પડશે તો કાયદાકીય વિકલ્પો પણ શોધવામાં આવશે.

મોદીએ ભ્રષ્ટાચારના કેસમાં ઇડી દ્વારા ધરપકડ કર્યા બાદ દિલ્હીના મુખ્યમંત્રી અરવિંદ કેજરીવાલને ટેકો આપવા બદલ કોંગ્રેસ પર પ્રહારો કર્યા હતા અને કહ્યું હતું કે જેમણે આમ આદમી પાર્ટી વિરુદ્ધ ફરિયાદ કરી હતી તેઓએ હવે પોતાનું વલણ બદલી નાખ્યું છે. "આ દર્શાવે છે કે તેમની પ્રાથમિકતા દેશ નહીં પરંતુ સત્તા છે, તેમણે ભારપૂર્વક જણાવ્યું હતું કે, ભાજપની આગેવાની હેઠળનું ગઠબંધન યુવાનોના ઉજ્જવળ ભવિષ્ય માટે, ભ્રષ્ટાચાર મુક્ત દેશ માટે લડી રહ્યું છે જ્યારે તમામ ભ્રષ્ટાચારીઓ એકબીજાને બચાવવાનો પ્રયાસ કરી રહ્યા છે.

રોય 18મી સદીના સ્થાનિક રાજા કૃષ્ણચંદ્ર રોયના પરિવારના છે. ભાજપે તેમને તેના ઉમેદવાર તરીકે જાહેર કર્યા પછી બ્રિટિશરોને કથિત રીતે સમર્થન આપવા બદલ શાહી પરિવારને નિશાન બનાવનારાઓ પર પણ મોદીએ વળતો પ્રહાર કર્યો હતો. રોયે મોદીને કહ્યું કે તેમના પરિવારને 'દેશદ્રોહી' કહેવામાં આવે છે. તેમણે કહ્યું કે કૃષ્ણચંદ્ર રોયે લોકો માટે કામ કર્યું હતું અને 'સનાતન ધર્મ' બચાવવા માટે અન્ય રાજાઓ સાથે હાથ મિલાવ્યા હતા. આવા આરોપોથી પરેશાન ન થાઓ. તેમણે કહ્યું કે તેઓ (તૃણમૂલ) વોટ બેંકની રાજનીતિ કરે છે અને તમામ પ્રકારના વાહિયાત આરોપો લગાવશે. વિપક્ષી પાર્ટીઓ તેમના પાપ છુપાવવા માટે આવું કરે છે.

વડાપ્રધાને વધુમાં કહ્યું કે એક તરફ તેઓ ભગવાન રામના અસ્તિત્વ પર સવાલ ઉઠાવે છે તો બીજી તરફ તેઓ બીજાને બદનામ કરવા માટે બે અને ત્રણ સદી જૂની ઘટનાઓને ટાંકે છે. કૃષ્ણચંદ્ર રોય દ્વારા સામાજિક સુધારણા માટે કરવામાં આવેલા કામની પ્રશંસા કરતી વખતે મોદીએ વિપક્ષને ટાંકીને કહ્યું કે, "આ તેમના બેવડા ધોરણો છે." તેમણે વિશ્વાસ વ્યક્ત કર્યો કે પશ્ચિમ બંગાળના લોકો પરિવર્તન માટે મત આપશે.

પીએમ મોદીએ રોયને કહ્યું, "તમારી પાસે બંગાળની વિરાસતને બચાવવાનો પડકાર છે." રોયે કહ્યું કે લોકોએ મોદી સરકારના કામ પર વિશ્વાસ વ્યક્ત કર્યો છે. તેમણે એવો પણ દાવો કર્યો હતો કે વિસ્તારના વર્તમાન સાંસદ મોઇત્રા જેલમાં જશે. આ સંભાળીને વડાપ્રધાન હસવાનું રોકી શક્યા નહીં. મોઇત્રા ભ્રષ્ટાચારના કેસમાં તપાસનો સામનો કરી રહ્યા છે. તેણે કથિત રીતે લાંચ અને અન્ય લાભોના બદલામાં એક ઉદ્યોગપતિને સંસદની વેબસાઇટ પર પોતાનું 'લોગ-ઇન' કરવાની મંજૂરી આપી હતી. મોઇત્રાએ ઉદ્યોગપતિને પોતાનો મિત્ર ગણાવ્યો છે અને ભ્રષ્ટાચારના આરોપોને રદિયો આપ્યો છે અને તેના માટે ભાજપને જવાબદાર ગણાવ્યો છે.