જૂનાગઢમાં ગઈકાલે ખાબકેલા વરસાદે તારાજી સર્જી છે. આ બાદ જૂનાગઢ કલેકટરે જાહેરનામું જારી કર્યું છે.  24 તારીખે રાત્રે 12 વાગ્યા સુધી બિનજરૂરી રીતે ઘરની બહાર નીકળવા પર પ્રતિબંધ ફરમાવ્યો છે. જિલ્લાના પ્રવાસન સ્થળો, જંગલ, ડેમ સહિતના વિસ્તારમાં પણ પ્રવેશ પર પ્રતિબંધ લગાવાયો છે.

શહેરમાં પાણીના પ્રવાહમાં ચીજવસ્તુઓ, ગાડીઓ, પશુઓ બાદ હવે લોકો પણ તણાવા લાગ્યા હોવાના વીડિયો પણ સામે આવ્યા હતા. અતિ ભારે વરસાદના પગલે નિચાણ વાળા અનેક વિસ્તારોમાં ગોઠણ સુધીના પાણી ભરાયા હતા અને દુકાનોમાં પણ પાણી ઘૂસ્યા હતા.

ગિરનાર જંગલમાં આભ ફાટ્યું હોય તેમ ગિરનારની સીડીઓ પર પાણીના ઘોડાપુર જોવા મળ્યા હતા, ગિરનાર પર પણ ભારે વરસાદના કારણે દામોદર કુંડમાં પણ મોટા પ્રમાણમાં પાણીની આવક થઇ છે.

જિલ્લાના ગ્રામ્ય વિસ્તારોમાં પણ ધોધમાર વરસાદ નોંધાયો છે. કેશોદ, વંથલી, માણાવદર સહિતના તાલુકાઓના ગ્રામ્ય વિસ્તારમાં પણ ધોધમાર વરસાદના કારણે નદી-નાળા છલકાયા છે.