ભાણવડથી આશરે ૨૦ કિલોમીટર દૂર રાણપર ગામની ગોલાઈ પાસેથી પૂરઝડપે અને બેફીકરાઈપૂર્વક જઈ રહેલા જી.જે. ૦૯ એ.ડી. ૫૭૧૮ નંબરના ટ્રેક્ટરના ચાલક રાજા ઉર્ફે રાજુ બાલાભાઈ કોડીયાતર (રહે. રાણપર) એ ગફલતભરી રીતે બ્રેક મારતા આ ટ્રેક્ટરમાં બેઠેલા સાગરબેન ગિરધારીભાઈ પારગી નામના આદિવાસી મહિલા ટ્રેક્ટરમાંથી નીચે પટકાઈ પડ્યા હતા. જેના કારણે તેણીને શરીરના જુદા જુદા ભાગોમાં ગંભીર ઈજાઓ થતા તેમનું મૃત્યુ નીપજ્યું હતું.
આ બનાવની જાણ મૃતકના પતિ ગિરધારીભાઈ કાલુભાઈ પારગી (ઉ.વ. ૨૧, રહે, મૂળ મધ્યપ્રદેશ) એ ભાણવડ પોલીસને કરી છે. જે અંગે પોલીસ ટ્રેક્ટરના ચાલક રાજા ઉર્ફે રાજુ કોડીયાતર સામે આઈ.પી.સી. કલમ ૨૭૮, ૩૦૪ (અ) તથા એમ.વી. એક્ટની કલમ મુજબ ગુનો નોંધ્યો છે.
**
બેહ ગામની મહિલાએ ઝેરી દવા પી જીંદગી ટૂંકાવી
ખંભાળિયા તાલુકાના બેહ ગામે રહેતા જેવાબેન વેજાણંદભાઈ પતાણી નામના મહિલાને છેલ્લા ત્રણેક દાયકાથી હિસ્ટોરિયાની બીમારી તેમજ છેલ્લા સાત-આઠ વર્ષથી માનસિક બીમારી હોય, આ બીમારીથી કંટાળીને તેમણે તારીખ ગત ૨૯ મીના રોજ પોતાની વાડીએ કપાસમાં છાંટવાની ઝેરી દવા પી લેતા તેમને સારવાર સાથે હોસ્પિટલમાં ખસેડવામાં આવ્યા હતા. જ્યાં સારવાર દરમિયાન તેમનું મૃત્યુ નીપજ્યું હતું. આ બનાવની જાણ મૃતકના પતિ વેજાણંદભાઈ મોમૈયાભાઈ પતાણીએ અહીંની પોલીસને કરી છે.