યુએનએ ભારતના 2024ના આર્થિક વિકાસના અંદાજ 7 % સુધી વિસ્તાર્યો

2024-25માં મર્ચેન્ડાઇઝ નિકાસ વૃદ્ધિ પર રહેશે ભાર, ફાર્માસ્યુટિકલ્સ અને રસાયણોની નિકાસમાં વિસ્તરણ થવાની ધારણા

સંયુક્ત રાષ્ટ્ર (યુએન) એ મજબૂત જાહેર રોકાણ અને ખાનગી વપરાશને ધ્યાનમાં રાખીને વર્ષ 2024 માટે ભારતના વિકાસના અંદાજમાં સુધારો કર્યો છે, જે મુજબ આ વર્ષે દેશની અર્થવ્યવસ્થા લગભગ 7%ના દરે વૃદ્ધિ પામી શકે છે.

ગુરુવારે બહાર પાડવામાં આવેલ 2024ના મધ્ય સુધીની વિશ્વ આર્થિક સ્થિતિ અને સંભાવનાઓમાં જણાવાયું છે કે, ભારતની અર્થવ્યવસ્થા 2024માં 6.9 ટકા અને 2025માં 6.6 ટકાના દરે વિસ્તરણ થવાની આગાહી છે, જોકે, બહારની માંગમાં ઘટાડો થવાથી મર્ચેન્ડાઇઝની નિકાસ વૃદ્ધિ પર ભાર રહેશે, ફાર્માસ્યુટિકલ્સ અને રસાયણોની નિકાસ મજબૂત રીતે વિસ્તરણ થવાની ધારણા છે.

અગાઉ 2024 માટે વૃદ્ધિનો અંદાજ 6.2% હતો. હવે તે 6.9% એટલે કે અગાઉના અંદાજ કરતા 0.7% વધુ છે. આ રીતે, ભારત વિશ્વમાં સૌથી ઝડપથી વિકસતી મોટી અર્થવ્યવસ્થા છે. રિપોર્ટ અનુસાર નીચા ફુગાવા, મજબૂત નિકાસ અને વિદેશી રોકાણમાં વધારાને કારણે ભારતીય અર્થવ્યવસ્થા ઝડપથી વધી રહી છે. ફુગાવો નીચે આવ્યો છે, જેનો અર્થ છે કે નાણાકીય સ્થિતિ અન્ય દેશોની જેમ વિક્ષેપિત નથી. ભારતમાંથી નિકાસ ખૂબ મજબૂત રહી છે અને તેની સાથે અન્ય પશ્ચિમી દેશોમાંથી આવતા રોકાણનો લાભ પણ ભારતને મળી રહ્યો છે, જ્યારે ચીનમાં રોકાણ ઘટી રહ્યું છે.

ઘણી પશ્ચિમી કંપનીઓ માટે ભારત ચીનની સરખામણીમાં રોકાણનો સારો વિકલ્પ બની ગયો છે. ભારતને રશિયા પાસેથી તેલની આયાત માટે વિશેષ વ્યવસ્થાનો લાભ પણ મળી રહ્યો છે, જેનાથી ખર્ચમાં ઘટાડો થઈ રહ્યો છે. આ રિપોર્ટ રોજગાર વિશે પણ હકારાત્મક વાત કરે છે. એટલે કે, ભારતમાં મજબૂત વૃદ્ધિ વચ્ચે, શ્રમ બજારના સૂચકાંકોમાં પણ સુધારો થયો છે. શ્રમ દળમાં મહિલાઓની ભાગીદારી વધી છે.

આગામી વર્ષ 2025 માટે ભારતનો વિકાસ અંદાજ 6.6% પર યથાવત છે. રિપોર્ટમાં કહેવામાં આવ્યું છે કે ભારતીય અર્થવ્યવસ્થા ગયા વર્ષે 7.5% અને 2022 માં 7.7% વધી હતી. રિપોર્ટમાં આ વર્ષે વિશ્વ અર્થતંત્રનો અંદાજ પણ અગાઉના 2.4%ના અંદાજથી 0.3% વધીને 2.7% કરવામાં આવ્યો છે. રિપોર્ટમાં ચેતવણી આપવામાં આવી છે કે, મોટાભાગની મોટી અર્થવ્યવસ્થાઓએ મંદીને જન્મ આપ્યા વિના બેરોજગારી ઘટાડીને ફુગાવાને ઘટાડવામાં સફળતા મેળવી છે. જો કે, ભૌગોલિક-રાજકીય જોખમો આર્થિક વૃદ્ધિને પડકારવાનું ચાલુ રાખશે.

વિકસિત અર્થવ્યવસ્થાઓની તુલનામાં, વિકાસશીલ અર્થવ્યવસ્થાઓ ઝડપી દરે (4.1%) વધી રહી છે. જોકે, રિપોર્ટમાં કહેવામાં આવ્યું છે કે વિકાસશીલ દેશોમાં વિકાસ સમાન નથી. ભારત, ઇન્ડોનેશિયા અને મેક્સિકો જેવા મોટા વિકાસશીલ અર્થતંત્રો મજબૂત સ્થાનિક અને બાહ્ય માંગથી લાભ મેળવી રહ્યાં છે, જ્યારે ઘણા આફ્રિકન, લેટિન અમેરિકન અને કેરેબિયન અર્થતંત્રો લાંબા સમયની રાજકીય અસ્થિરતા, ઉચ્ચ ઉધાર ખર્ચ અને વિનિમય દરની વધઘટનો સામનો કરી રહ્યાં છે.

આ વર્ષે, ચીનની અર્થવ્યવસ્થા 4.8% ના દરે વૃદ્ધિ પામે તેવી અપેક્ષા છે, જે તેને ભારત પછી બીજા નંબરની સૌથી ઝડપથી વિકસતી મુખ્ય અર્થવ્યવસ્થા બનાવે છે. રિપોર્ટમાં કહેવામાં આવ્યું છે કે, અમેરિકાની અર્થવ્યવસ્થા પહેલા કરતા થોડી સારી થઈ ગઈ છે. યુએસ અર્થતંત્ર આ વર્ષે 2.3% ના દરે વૃદ્ધિની અપેક્ષા છે.