રાષ્ટ્રીય વાહકજન્ય રોગ નિયંત્રણ માટે દેવભૂમિ દ્વારકા જિલ્લા આરોગ્ય તંત્ર દ્વારા તા. 22 થી 30 એપ્રિલ સુધીમાં હાઉસ ટુ હાઉસ સર્વેલન્સ કામગીરીનો પ્રથમ તબક્કો પૂર્ણ કરવામાં આવ્યો છે. હવે તા. 20 થી 30 મે સુધીમાં હાઉસ ટુ હાઉસ સર્વેલન્સનો બીજો તબક્કો પણ શરૂ કરવામાં આવશે. આ દિવસો દરમિયાન બીજા રાઉન્ડમાં હાઉસ ટુ હાઉસ સર્વેલન્સ, જાહેર સ્થળો,બાંધકામ સાઈટ, જીઆઈડીસી સહિતના વિસ્તારોની મુલાકાત લેવામાં આવશે. જેમાં ફીવર સર્વેલન્સ સાથે પોરાની ઉત્પત્તી થઈ શકે તેવા સંભવિત જગ્યાઓ પર રોગ અટકાયત કામગીરી કરવામાં આવશે.

આ ઉપરાંત ચાલુ વર્ષ દરમિયાન જિલ્લામાં મેલેરિયા માટે હાઇરીસ્ક કુલ 4 ગામોની કુલ 3293 જેટલી વસ્તીમાં જંતુનાશક દવા આલ્ફાસાયપર મેથ્રીન 5 ટકા છંટકાવ કામગીરીના બે રાઉન્ડ 8 ઓગષ્ટ સુધીમાં કરવાનું આયોજન છે.

રાષ્ટ્રીય વાહકજન્ય રોગ નિયંત્રણ કાર્યક્રમ અંતર્ગત ભારતને મેલેરિયા મુક્ત બને તે ઉદ્દેશ્યથી કામગીરી ચાલી રહી છે. બદલાયેલા વાતાવરણને પગલે આ વર્ષે આરોગ્ય તંત્ર વાહકજન્ય રોગોને લઈને વધારે ગંભીર છે. જોકે આ વખતે ત્રણ રાઉન્ડમાં કામગીરીનું આયોજન કરાયું છે, જે અંતર્ગત જિલ્લા આરોગ્ય અધિકારી ડો. એમ.એન. ભંડેરીના માર્ગદર્શનમાં જિલ્લા મેલેરીયા અધિકારી ડો. એમ.ડી. જેઠવાની આગેવાનીમાં ખાસ કામગીરી કરાશે. જે અંતર્ગત 20 થી 30 મે સુધી આશા વર્કર બહેનો અને હેલ્થ વર્કરો પોતાના વિસ્તારોમાં હાઉસ ટુ હાઉસ સર્વેલન્સ કરશે,જેમાં ગામની સરકારી અને ખાનગી સંસ્થાઓ, ગામની દુકાનો, હોટલ સહિતની દુકાનો જેવા સ્થળોને પણ આવરી લેવામાં આવશે.