રાજકોટ એસટી ડિવિઝનને આ વર્ષે દિવાળી બરાબર ફળી છે, તા.11થી 17 સુધીના છેલ્લા સાત દિવસમાં ડિવિઝનએ એક્સ્ટ્રા બસની આવક સહિત કુલ રૂ.પાંચ કરોડની કમાણી કરી છે, લગભગ ચાર વર્ષ પછી મુસાફરોનો આવો ધસારો જોવા મળ્યો હતો. જ્યારે આજથી સુરત તરફ રિટર્ન જવા ભારે ટ્રાફિક જોવા મળી રહ્યો છે.

રાજકોટ એસટી ડિવિઝન કચેરીના સૂત્રોએ જણાવ્યું હતું કે તા.11 નવેમ્બરથી રાજકોટ ડિવિઝન હેઠળના કુલ નવ ડેપો જેમાં રાજકોટ એસટી બસપોર્ટ, ગોંડલ, મોરબી, જસદણ, વાંકાનેર, ચોટીલા, લીંબડી, ધ્રાંગધ્રા અને સુરેન્દ્રનગર સહિતના તમામ ડેપો ખાતેથી મુસાફરોના ધસારાને પહોંચી વળવા જરૂરિયાત મુજબ એક્સ્ટ્રા બસ દોડાવાઇ હતી જેમાં ડિવિઝન લેવલે રોજિંદી આવક અને એક્સ્ટ્રા બસની આવક મળી આજે તા.17 સુધીના છેલ્લા સાત દિવસની કુલ આવક રૂ.પાંચ કરોડને પાર પહોંચી છે.આજથી સુરત માટેનો રિટર્ન ટ્રાફિક વધવા લાગતા જરૂરિયાત મુજબ એક્સ્ટ્રા બસ મુકવામાં આવી રહી છે.