સ્વાતિ પાર્ક મેઈન રોડ પર રાધેશ્યામ ઇન્ડસ્ટ્રીઝ એરિયામાં આવેલા કેશવ પ્લાસ્ટિક નામના કારખાનામાં પૂર્વ બાતમીના આધારે પીસીબીએ દરોડો પાડી પ્લાસ્ટિકના બાચકામાં છુપાવેલી ઈંગ્લીશ દારૂની 240 બોટલ મળી આવતા કબ્જે કરી કારખાનાના સંચાલક જયેશ અમીપરા સામે ગુનો નોંધી શોધખોળ હાથ ધરી છે.

પોલીસ સૂત્રોમાં નોંધાયેલી વિગત મુજબ પીસીબીના ઇન્ચાર્જ પીઆઈ એમ.આર.ગોંડલીયાના માર્ગદર્શન હેઠળ સ્ટાફ પેટ્રોલીંગમાં હતો ત્યારે પો.હેડ કોન્સ.. કુલદીપસિંહ, વિજયભાઈ તથા યુવરાજસિંહને ચોક્કસ બાતમી મળી હતી કે, સ્વાતિ પાર્ક મેઈન રોડ પર રાધેશ્યામ ઇન્ડસ્ટ્રીઝ એરિયામાં બંધ શેરીમાં આવેલા કેશવ પ્લાસ્ટિક નામના કારખાનામાં ઈંગ્લીશ દારૂનો જથ્થો ઉતરવામાં આવ્યો છે. જે બાતમીના આધારે પીસીબીની ટીમે દરોડો પાડી પ્લાસ્ટિકના રો મટીરીયલ્સના બાચકાની તલાસી લેતા તેમાંથી ઈંગ્લીશ દારૂની 240 જેટલી બોટલ કી.રૂ.24000ની મળી આવતા કબ્જે કરી હતી.

પોલીસની તપાસમાં કારખાનું જેમિસ રામાણીની માલિકનું હોય અને તેણે જયેશ અમીપરા નામના વ્યક્તિને ભાડે આપ્યું હતું. જયેશ કારખાનામાં પ્લાસ્ટિકની સાથે દારૂનું પણ વેંચાણ કરતો હોવાનું ખુલ્યું હતું. આ ઉપરાંત જયેશ અગાઉ ભક્તિનગર પોલીસમાં દારૂના ગુનામાં પકડાઈ ચુક્યો છે. પોલીસે જયેશ અમીપરા સામે ગુનો નોંધી ઝડપી લેવા તજવીજ હાથ ધરી છે.