ઈરાનની રાજધાની તેહરાનથી 540 કિલોમીટર દૂર એક મોટી ઘટના સામે આવી છે. પૂર્વી ઈરાનના તબાસ સ્થિતિ કોલસાની ખાણમાં શનિવારે રાત્રે થયેલા પ્રચંડ વિસ્ફોટમાં 51 લોકોએ જીવ ગુમાવ્યા છે. મૃત્યુઆંક હજુ વધી શકે છે. ઈરાનનું સ્થાનિક વહીવટીતંત્ર રાહત અને બચાવ કાર્યમાં લાગેલું છે. ખાણમાં હજુ પણ ઘણા લોકો ફસાયેલા છે.

લેબનોનમાં ઈરાન સમર્થિત હિઝબુલ્લાહ પર ઈઝરાયેલના હુમલા વચ્ચે ઈરાનમાં એક મોટી દુર્ઘટના થઈ છે. મિથેન ગેસના લીકેજને કારણે પૂર્વી ઈરાનમાં કોલસાની ખાણમાં જોરદાર વિસ્ફોટ થયો હતો. આ અકસ્માતમાં અત્યાર સુધીમાં 51 લોકોએ જીવ ગુમાવ્યા છે અને 20 લોકો ઘાયલ થયા છે.

સરકારી મીડિયાના અહેવાલો અનુસાર આ દુર્ઘટના ઈરાનની રાજધાની તેહરાનથી લગભગ 540 કિલોમીટર દક્ષિણ-પૂર્વમાં સ્થિત તબાસમાં થઈ હતી. શનિવારે મોડી રાત્રે થયેલા પ્રચંડ વિસ્ફોટ બાદ ઇમરજન્સી કર્મચારીઓને ઘટનાસ્થળે મોકલવામાં આવ્યા છે. વિસ્ફોટ સમયે લગભગ 70 લોકો ત્યાં કામ કરી રહ્યા હતા.