એનઆઈએની ચાર્જશીટમાં હરદીપ સિંહની 'ક્રાઈમ કુંડળી' સામે આવી 
​​​​​​​કેનેડાથી 'ટેરર કંપની' ચલાવતા હતા અર્શદીપ અને નિજ્જર

નેશનલ ઈન્વેસ્ટિગેશન એજન્સીની ચાર્જશીટમાં ખુલાસો થયો છે કે નિજ્જર ખાલિસ્તાન ટાઈગર ફોર્સનો ચીફ હતો. કેનેડામાં આશ્રય લઈ રહેલા અર્શદીપ ઉર્ફે અર્શ ધલ્લાએ નિજ્જરને તેની આતંકવાદી પ્રવૃત્તિઓમાં મદદ કરી હતી. અર્શદીપ અને નિજ્જર સંયુક્ત રીતે કેનેડાની 'ટેરર કંપની' ચલાવતા હતા. હવે ભારત તરફથી પુરાવા રજૂ કરવામાં આવશે કે હરદીપ સિંહ નિજ્જર ખાલિસ્તાની આતંકવાદી છે.

તાજેતરમાં ભારત સરકાર દ્વારા એક ગેઝેટ નોટિફિકેશન બહાર પાડવામાં આવ્યું હતું. જેમાં અર્શદીપ અને હરદીપ સિંહ નિજ્જરને વૈશ્વિક આતંકવાદી જાહેર કરવામાં આવ્યા હતા. ગેઝેટ નોટિફિકેશનમાં કહેવામાં આવ્યું હતું કે કેનેડામાં બેઠેલા અર્શદીપ ઉર્ફે અર્શ ધલ્લા અને હરદીપ સિંહ નિજ્જર ખાલિસ્તાન ટાઈગર ફોર્સના આતંકવાદીઓ છે. એવું કહેવામાં આવ્યું હતું કે અર્શદીપ ખાલિસ્તાની આતંકવાદી હરદીપ સિંહ નિજ્જરની ખૂબ નજીક હતો.

ગેઝેટ નોટિફિકેશનમાં જણાવવામાં આવ્યું હતું કે કેનેડામાં રહેતો અર્શદીપ ઉર્ફે અર્શ ધલ્લા ટાર્ગેટ કિલિંગ, ખંડણી, ટેરર ફંડિંગ, હત્યા, વિવિધ સમુદાયોમાં નફરત ફેલાવવા અને પંજાબના લોકોમાં આતંક ફેલાવવામાં સામેલ છે. એટલું જ નહીં પરંતુ અર્શદીપ નિજ્જરની સાથે મળીને તે સરહદ પારથી ટેરર ફાઇનાન્સિંગ અને ડ્રગ્સ અને હથિયારોની દાણચોરી પણ કરતો હતો. એક રીતે આ બંને કેનેડામાં 'ટેરર કંપની' ચલાવી રહ્યા છે.

ચાર્જશીટમાં ખુલાસો થયો છે કે વૈશ્વિક આતંકવાદીઓ હરદીપ સિંહ નિજ્જર અને અર્શદીપ સિંહ ઉર્ફે અર્શ ધલ્લાએ આતંકવાદી ગેંગ બનાવી હતી. ત્યાર બાદ લવપ્રીત સિંહ ઉર્ફે રવિ, રામ સિંહ ઉર્ફે સોના, ગગનદીપ સિંહ ઉર્ફે ગગ્ગા અને કમલજીત શર્મા ઉર્ફે કમલને કેનેડાના વિઝા અપાવીને ત્યાં નોકરી અપાવવાની લાલચ આપી હતી. એકવાર તેઓ તેની જાળમાં આવી ગયા પછી, તેને શૂટર બનાવી દેવાયા હતા અને આતંક ફેલાવવાનું કામ સોંપવામાં આવ્યું.

એનઆઈએએ તેની ચાર્જશીટમાં ખુલાસો કર્યો છે કે અર્શદીપ સિંહ ઉર્ફે અર્શ ધલ્લા, હરદીપ સિંહ નિજ્જર સાથે મળીને તેમની ગેંગના સભ્યોને ટાર્ગેટની ડીટેઇલ મોકલતા હતા. તેમને હથિયાર પૂરા પાડવામાં આવ્યા હતા અને આતંક ફેલાવવા માટે ફંડ પણ વિવિધ ચેનલો દ્વારા શૂટર્સને પૂરું પાડવામાં આવ્યું હતું. આ પછી હવાલાના પૈસા અર્શદીપ મારફતે કેનેડા પહોંચતા હતા.