એરપોર્ટ પોલીસ મથકના સ્ટાફે રાત્રિના રાજકોટ તાલુકાના મેસવડા ગામની સીમમાં આવેલી વાડીએ દરોડો પાડતા અહીં ઘાસના ઢગલા નીચે છુપાવેલો દારૂનો જથ્થો મળી આવ્યો હતો. પોલીસે વાડીમાંથી રૂપિયા ૨.૨૯ લાખની કિંમતનો ૬૧૨ બોટલ દારૂનો જથ્થો ઝડપી લીધો હતો. જોકે વાડીમાલીક હાજર ન હોય પોલીસે તેની સામે ગુનો નોંધી તેને ઝડપી લેવા તપાસ હાથ ધરી છે.
​​​​​​​
દારૂના આ દરોડાની જાણવા મળતી વિગતો મુજબ, એરપોર્ટ પોલીસ મથકના પી.આઈ જે.એસ.ગામીતની રાહબરી હેઠળ પી.એસ.આઇ એ.કે.રાઠોડ તથા તેમની ટીમ જેમાં હેડ કોન્સ્ટેબલ એચ.એસ તળાવીયા, બી.બી.ડોડીયા, કોન્સ્ટેબલ વિજયભાઈ, નરેશકુમાર સહિતનાઓ રાત્રિના પેટ્રોલિંગમાં હતા. દરમિયાન એવી બાતમી મળી હતી કે, મેસવડામાં રહેતા બેચર તલસાણીયાએ અહીં ગામની સીમમાં આવેલ પોતાની વાડીએ વિદેશી દારૂનો જથ્થો છુપાવી રાખ્યો છે અને તે આ જથ્થો સગેવગે કરવાની પૈરવીમાં છે જેથી પોલીસની ટીમ અહીં પહોંચી પગપાળા વાડીએ પહોંચતા અહીં કોઈ હાજર ન હોય આસપાસમાં આવેલી વાડીએ પૂછતા આ વાડી મેસવડા ગામના હરજીભાઈ બેચરભાઈ તલસાણીયાની હોવાનું સ્પષ્ટ થયુ હતું.
પોલીસે તપાસ કરતા અહીં ઘાસના ઢગલામાં છુપાવેલી વિદેશી દારૂની ૬૧૨ બોટલ મળી આવી હતી તેમજ એક મોબાઇલ ફોન પણ મળી આવ્યો હોય પોલીસે દારૂનો આ જથ્થો અને મોબાઈલ સહિત કુલ રૂપિયા ૨,૩૪,૫૦૦ નો મુદ્દામાલ કબજે કર્યો હતો. જોકે પોલીસ પહોંચે તે પૂર્વે વાડી માલિક હરજી બેચર તલસાણીયા નાસી ગયો હોય પોલીસે તેની સામે પ્રોહીબિશન એક્ટની કલમ હેઠળ ગુનો નોંધી તેને ઝડપી લેવા તપાસ હાથ ધરી છે.