પિમ્પલ્સ થવા એ ખૂબ જ સામાન્ય સમસ્યા છે, પરંતુ તેના કારણે ચહેરો ખૂબ જ ખરાબ દેખાવા લાગે છે. મોટાભાગે ટીનેજર્સમાં પીમ્પ્લ્સની સમસ્યા વધુ જોવા મળે છે. તે હોર્મોનલ બદલાવને કારણે હોય શકે છે. આ સિવાય પિમ્પલ્સ થવાના કારણોમાં યોગ્ય ખાનપાન, ત્વચાનું યોગ્ય ધ્યાન ન રાખવું, પ્રદૂષણ, ત્વચાની વધુ પડતી ચીકાશ પણ છે. જો સમયસર કાળજી લેવામાં ન આવે તો પિમ્પલ્સના ડાઘ રહી જાય છે.

પિમ્પલ્સથી છુટકારો મેળવવા માટે લોકો તેમના ચહેરા પર જુદા જુદા ફેસપેક લગાવે છે અને DIY હેક્સ પણ અજમાવતા હોય છે. આટલું કરવા છતાં જો પિમ્પલ્સ ઓછા નથી થતા તો ત્વચા પર નહીં પણ પેટ પર ધ્યાન આપવાની જરૂર છે.

કબજિયાતને કારણે ત્વચાની સમસ્યા થઈ શકે છે

જો પેટ બરાબર સાફ નથી થતું અને દરરોજ કબજિયાતની સમસ્યાથી પરેશાન છો તો શરીરમાં ઝેરી તત્વો જમા થવા લાગે છે. જેની અસર માત્ર સ્વાસ્થ્ય પર જ નહીં પરંતુ ત્વચા પર પણ જોવા મળે છે. જો પાચનની સમસ્યા હોય તો તેના કારણે પિમ્પલ્સ પણ થઈ શકે છે.

પેટમાં વધેલી ગરમી

ચહેરા પર પિમ્પલ્સ અથવા મોઢામાં ફોલ્લા પેટમાં ગરમી વધી જવાને કારણે હોઈ શકે છે. ખાસ કરીને ઉનાળામાં આ સમસ્યા વધુ જોવા મળે છે. તેની પાછળનું કારણ ઓછું પાણી પીવું, વધુ તળેલું ખાવું, મસાલેદાર ખોરાક, ચેપ વગેરે જેવી બાબતો હોઈ શકે છે. પેટને ઠંડક આપવા માટે  આહારમાં ચરબીયુક્ત ખોરાકનો સમાવેશ ન કરવો જોઈએ અને દહીં, વરિયાળી, ફુદીનો જેવી વસ્તુઓનો સમાવેશ કરો.

આ વસ્તુઓનો ઉપયોગ ઘટાડો

જો ચહેરા પર પિમ્પલ્સ હંમેશા દેખાય છે, તો તેલયુક્ત અને મસાલેદાર ખોરાક ખાવાનું ટાળવું જોઈએ. જંક ફૂડ બિલકુલ ટાળો, કારણકે તે સ્વાસ્થ્ય માટે પણ હાનિકારક છે. વધુ માત્રામાં પાણી પીવો. આ સિવાય આહારમાં વધુ પ્રમાણમાં મીઠાઈઓ ખાવાનું ટાળો.

ડૉક્ટરનો સંપર્ક કરો

જો આહારનું ધ્યાન રાખવા છતાં પણ પિમ્પલ્સ ઓછા નથી થતા, તો ડૉક્ટરની સલાહ લેવી જોઈએ કારણ કે તેની પાછળનું કારણ હોર્મોનલ અસંતુલન હોઈ શકે છે.