શહેરના કુંભારવાડા, રામદેવનગરમાં રહેતા પિતાએ તેના પુત્રને આજ વિસ્તારમાં રહેતા શખ્સો સાથે બેસવાની ના કહેતા શખ્સોએ બોલાચાલી કરી ઉશકેરાઈ જઈ ધોકા સહિતના હથિયાર વડે હુમલો કર્યાની ફરિયાદ નોંધાવાતા પોલીસે તપાસ હાથ ધરી હતી.
ઉપલબ્ધ વિગતો મુજબ શહેરના કુંભારવાડા, રામદેવનગરમાં રહેતા ગોવિંદભાઇ કમાભાઈ ભાથી (ઉ. વ. ૫૨)એ બોરતળાવ પોલીસ મથકમાં એવી ફરિયાદ નોંધાવી હતી કે પોતાનો પુત્રઆજ વિસ્તારમાં રહેતા લાલો ઉર્ફે કુંભો, નરેશ ઉર્ફે ભગત, રમેશ ઉર્ફે અદો, બાયો બારૈયા અને ભગત ઉર્ફે કાળીયો સાથે બેસતો હોય પુત્રને આ લોકો સાથે બેસવાની ના કહેતા ઉપરોક્ત તમામે ઉશકેરાઈ જઈ ગાળો બોલી બોલાચાલી કરી હતી જે દરમ્યાન તમામે ઉશકેરાઈ જઈ સાયકલનું ચક્કર લગાવેલ ધોકા સહિતના હથિયાર વડે હુમલો કરી પોતાને અને પુત્રને ઇજાઓ પહોંચાડી નાસી છૂટ્યા હતા. ગોવિંદભાઇએ નોંધાવેલી ફરિયાદના આધારે બોરતળાવ પોલીસે તમામ શખ્સો સામે ગુનો દાખલ કરી આગળની વધુ તપાસ હાથ ધરી હતી.