અસત્ય પર સત્યનો વિજય એટલે વિજયાદશમી, આજે સૌરાષ્ટ્ર કચ્છમાં દશેરા પર્વની ધામધૂમ સાથે ઉજવણી કરવામાં આવી હતી. નવ નવ રાત્રિ સુધીમાં જગદંબાની આરાધના સાથે પ્રાચીન અને અવર્ચિીન રાસની રમઝટ બાદ આજે સવારે ગાંઠિયા જલેબીના તડાકા સાથે અને સાંજે રાવણ દહન સાથે દશેરા પર્વની ઉજવણી કરવામાં આવી હતી.વિજયાદશમી એટલે વણ જોયું મુહૂર્ત.. આજે શુભ કાર્યોની વણઝાર થઈ છે. ગૃહ પ્રવેશ, નવા જમીન કે મકાનની ખરીદી, વાહનોની ખરીદી સાથે આજે પીળી ધાતુ એટલે કે સોનાના દાગીનાની ખરીદીનું શુભ દિવસ હોવાથી લોકોએ પણ આ શુકન સાચવ્યું હતું.


વહેલી સવારથી શોરૂમ પર વાહનો, ઇલેક્ટ્રોનિક ઉપકરણો, સોના ચાંદીના દાગીનાની ખરીદી માટે લોકોનો ઘસારો જોવા મળ્યો હતો.દશેરાના દિવસે ક્ષત્રિય સમાજ દ્વારા શસ્ત્ર પૂજન કરવામાં આવે છે આજે ક્ષત્રિય સમાજ દ્વારા પરંપરાગત વસ્ત્રો પરિધાન સાથે વિશાળ શોભા યાત્રા અને ત્યારબાદ મંત્રોચ્ચાર સાથે શસ્ત્ર પૂજન કરવામાં આવ્યું હતું. નવરાત્રીમાં નવ દિવસ સુધીમાં આદ્યશક્તિની આરાધના કરી હતી. આજે પણ દશેરાના દિવસે ગરબા લઈ ત્યારબાદ ગરબીની બાળાઓને નાની વિતરણ કરવામાં આવશે. જ્યારે અવર્ચિીન રાસમાં નવ દિવસ સુધી ગરબે ઘૂમી પ્રિન્સ અને પ્રિન્સેસ બનેલા ખેલૈયાઓ માટે આજે મેગા ફાઈનલ સાથે કિંગ અને ક્વીન નું બિરુદ સાથે લાખોના ઇનામોની વણઝાર મેળવશે.


ઉત્સવ પ્રિય સૌરાષ્ટ્રમાં ગઈકાલે રાત્રે ગરબા ની રમઝટ ખેલૈયાઓએ બોલાવ્યા બાદ મોડી રાત્રે ગાંઠિયા અને જલેબી નો તડાકો બોલાવી દશેરાની ઉજવણી કરી હતી.રાજકોટમાં આજે ગુજરાતના સૌથી મોટા રાવણનું દહન કરવામાં આવશે વિશ્વ હિન્દુ પરિષદ દ્વારા રાજકોટના રેસકોર્સ મેદાનમાં સૌથી ઊંચા રાવણનું પૂતળું બનાવવામાં આવ્યું છે.ફટાકડાની આતશબાજી સાથે રાવણ દહન કરવામાં આવશે.