પ્રસ્તાવને રક્ષામંત્રીની મંજૂરી, એર વોરિયર્સના અધિકારીઓની જેમ માતૃત્વ, બાળ સંભાળ અને બાળક દત્તક લેવા માટેની રજા મળશે




દિવાળી પહેલા મહિલા સૈનિકોને સરકાર દ્વારા એક મોટી ભેટ મળી છે. હવે ભારતીય સેનામાં મહિલા સૈનિકોને નેવીમાં મહિલા ખલાસીઓ અને એરફોર્સમાં મહિલા એર વોરિયર્સના અધિકારીઓની જેમ માતૃત્વ, બાળ સંભાળ અને બાળક દત્તક લેવા માટેની રજા મળશે. આ નિયમો દરેકને લાગુ પડશે પછી તે અધિકારી હોય કે સૈનિક. રક્ષા મંત્રી રાજનાથ સિંહે આ પ્રસ્તાવને મંજૂરી આપી દીધી છે.

સંરક્ષણ મંત્રાલયના જણાવ્યા અનુસાર, આનાથી સેનામાં મહિલાઓને પારિવારિક અને સામાજિક મુદ્દાઓ સાથે વ્યવહાર કરવામાં પણ મદદ મળશે. આનાથી સૈન્યમાં મહિલાઓની કામ કરવાની સ્થિતિમાં સુધારો થશે અને તેઓ તેમના વ્યાવસાયિક અને પારિવારિક જીવનને વધુ સારી રીતે સંચાલિત કરી શકશે.

ભારતીય સેનામાં સૈનિકો તરીકે મહિલાઓની ભરતી ૨૦૧૯ થી શરૂ થઈ છે. મિલિટરી પોલીસ કોર્પ્સમાં સૈનિકો તરીકે મહિલાઓને તૈનાત કરવામાં આવે છે. અગ્નિપથ યોજનાના અમલીકરણ સાથે, મહિલાઓ હવે અગ્નવીર તરીકે લશ્કરી પોલીસ કોર્પ્સમાં પણ જોડાઈ રહી છે. ભારતીય નૌકાદળમાં અગ્નિપથ યોજનાના અમલ સાથે, અગ્નિવીર તરીકે મહિલા ખલાસીઓની ભરતી પણ શરૂ થઈ. નૌકાદળના અગ્નિવીરોની પ્રથમ બેચમાં ૨૬૦૦ અગ્નિવીર હતા, જેમાં ૨૭૩ મહિલા અગ્નિવીરોનો પણ સમાવેશ થાય છે.

ભારતીય વાયુસેનાને ટૂંક સમયમાં મહિલા અગ્નિવીર પણ મળશે. વાયુસેનાના અગ્નિવીરની પ્રથમ બેચમાં કોઈ મહિલા નહોતી કારણ કે તે સમયે તેમના માટે ઈન્ફ્રાસ્ટ્રક્ચર અને જરૂરી સુવિધાઓ તૈયાર કરવામાં આવી રહી હતી. મહિલા અગ્નિવીરની એરફોર્સ દ્વારા બીજી બેચમાં ભરતી કરવામાં આવી હતી અને હાલમાં તેમની તાલીમ ચાલી રહી છે. આ બેચ ડિસેમ્બરમાં પાસ આઉટ થઈને એરફોર્સમાં જોડાશે.


મહિલા સૈનિકોને મળે છે ૩૬૦ દિવસની રજા

હાલમાં સેનામાં મહિલા અધિકારીઓને બાળક માટે ૧૮૦ દિવસની પ્રસૂતિ રજા મળે છે. આ નિયમ વધુમાં વધુ બે બાળકોને લાગુ પડે છે. સમગ્ર સેવા કાર્યાલયમાં મહિલા અધિકારીઓ ૩૬૦ દિવસની બાળ સંભાળ રજા માટે હકદાર છે. આ માટે બાળકની ઉંમર ૧૮ વર્ષથી ઓછી હોવી જોઈએ. એક વર્ષથી ઓછી ઉંમરના બાળકને દત્તક લેવાની માન્ય તારીખ પછી ૧૮૦ દિવસની રજા આપવામાં આવે છે.