દેશના કરદાતાઓએ આ વર્ષે સરકારના ખિસ્સામાં એટલા રૂપિયા નાંખ્યા છે કે ડાયરેક્ટ ટેક્સ કલેક્શનનો નવો રેકોર્ડ સર્જાયો છે. સરકારની કોર્પોરેટ અને પર્સનલ એમ બંને શ્રેણીના આવકવેરા વસૂલાતમાં વધારો થયો છે.

ટેક્સ કલેક્શન વધારવા માટે મોદી સરકારના પ્રયાસોની અસર હવે દેખાઈ રહી છે. વર્તમાન નાણાકીય વર્ષ 2022-23માં 10 ફેબ્રુઆરી, 2023 સુધી કરવામાં આવેલા ટેક્સ કલેક્શન પર નજર કરીએ તો દેશના કરદાતાઓએ અત્યાર સુધીનો સૌથી વધુ ટેક્સ ભરવાનો રેકોર્ડ બનાવ્યો છે. આવકવેરા અને કોર્પોરેટ ટેક્સ સહિત, સરકારના કુલ બજેટ અંદાજના 91.39 ટકા પ્રત્યક્ષ કરમાંથી એકત્રિત કરવામાં આવ્યા છે.

નાણા મંત્રાલયે શનિવારે માહિતી આપી હતી કે આ વર્ષે 10 ફેબ્રુઆરી સુધી તેના પ્રત્યક્ષ કર સંગ્રહમાં ગયા વર્ષના સમાન સમયગાળાની તુલનામાં 24.09 ટકાનો વધારો થયો છે. રિફંડ દૂર કર્યા પછી, સરકારના ટેક્સ કલેક્શનમાં 18.40 ટકા જેટલો વધારો નોધાયો છે.

આંકડાઓ અનુસાર, 10 ફેબ્રુઆરી, 2023 સુધી સરકારનું ગ્રોસ ડાયરેક્ટ ટેક્સ કલેક્શન 15.67 લાખ કરોડ રૂપિયાનું રહ્યું છે. આમાંથી ઈન્કમ ટેક્સ રિફંડ હટાવ્યા બાદ તેનું કલેક્શન 12.98 લાખ કરોડ રૂપિયા થઈ ગયું છે. એટલું જ નહીં, સરકારના છેલ્લા બજેટના ટેક્સ કલેક્શનના અંદાજના 91.39 ટકા છે. તે જ સમયે, તે ડાયરેક્ટ ટેક્સના સુધારેલા અંદાજના 78.65 ટકા છે.

દેશમાં પ્રત્યક્ષ કર બે રીતે વસૂલવામાં આવે છે. એક કોર્પોરેટ ટેક્સના સ્વરૂપમાં, બીજો વ્યક્તિના આવકવેરાના સ્વરૂપમાં. હવે જો આપણે તાજેતરના આંકડાઓ પર નજર કરીએ તો, આ વર્ષે કોર્પોરેટ આવકવેરામાં 19.33 ટકાનો વધારો થયો છે, જ્યારે સામાન્ય માણસ દ્વારા ચૂકવવામાં આવતા આવકવેરામાં 29.63 ટકાનો વધારો નોંધવામાં આવ્યો છે.

રિફંડના હિસાબ પછી, કોર્પોરેટ ટેક્સ કલેક્શનનો ગ્રોથ 15.84 ટકા રહ્યો છે, જ્યારે સામાન્ય માણસના ટેક્સ કલેક્શનનો વૃદ્ધિ દર 21.93 ટકા રહ્યો છે.
​​​​​​​

સરકારે 1 એપ્રિલ 2022થી 10 ફેબ્રુઆરી 2023 દરમિયાન રિફંડ કરાયેલી રકમની વિગતો પણ આપી છે. આ સમયગાળા દરમિયાન, સરકારે રૂ. 2.69 લાખ કરોડની રિફંડ અરજીઓ પર પ્રક્રિયા કરી છે, જે ગયા વર્ષના સમાન સમયગાળાની સરખામણીએ 61.58 ટકા વધુ છે.