દામનગરમાં હરિકૃષ્ણ ડાયમંડ નામની ઓફિસ રાખી હીરાની લે-વેંચ કરતા વેપારી સાથે મૂળ કુંકાવાવના દેવગામનો અને હાલ મુંબઈના કાંદિવલી વિસ્તારમાં રહેતા શખસે જુદા જુદા કેરેટના હીરા લઇ રૂ.22,79,752 ન ચૂકવી છેતરપીંડી કરવામાં આવતા વેપારીએ અરવિંદભાઇ વલ્લભભાઇ શેલડીયા નામના શખસ સામે દામનગર પોલીસમાં ફરિયાદ નોંધાવી છે.

પ્રાપ્ત વિગત મુજબ દામનગરમાં રહેતા અને હીરાબજારમાં હરિકૃષ્ણ ડાયમંડ નામની ઓફીસ રાખી હીરાની લે વેંચ કરતા સાગરભાઈ કનુભાઈ બોખા (ઉ.વ.31) નામના વેપારીએ નોંધાવેલી ફરિયાદમાં જણાવ્યું છે કે, હીરાની દલાલી કરતા અને મુંબઈ સ્થિત મિત્રો મારફતે મૂળ દેવગામના અને હાલ મુંબઈમાં ૭૦૨, સી-વીંગ, મુકતા મહેક, ઠાકુર કોમ્પ્લેક્ષ, અહીતી હોસ્પિટલની બાજુમા કાંદિવલી ઇસ્ટમાં રહેતા અરવિંદ વલ્લભભાઈ શેલડીયા સાથે પરિચયમાં આવતા તેની સાથે હીરાની લે વેંચનો વેપાર તા.1-4-23 શરુ કરતા શરૂઆતમાં હું હીરાની લેતી દેતીના પૈસા આંગડિયા પેઢી મારફત મોકલતા હતા. આમ બારેક વખત લેતી દેતીનો વ્યવહાર થયા બાદ તા.24-8-24 થી 20-9-24 સુધીમાં કૂલ-૧૦૮ કેરેટ અને ૦૪ સેન્ટના હિરા જેના કૂલ રૂ.૨૨,૭૯,૭૫૨ થાય છે જે ના પૈસા આજદિન સુધી વારંવાર ઉઘરાણી કરવા છતાં આપતા ન હોવાથી વિશ્વાસઘાત થયાનું જણાતા ફરિયાદ નોંધાવી છે. પોલીસે વેપારીની ફરિયાદના આધારે મુંબઈના દલાલ સામે ગુનો નોંધી આગળની તપાસ હાથ ધરી છે.