અકસ્માતમાં પગમાં ફ્રેકચર થતા કામ નહી કરી શકતા લાગી આવ્યું

જોડીયાના પીઠડ ગામના શ્રમિક મહિલાને ૩ મહીના પહેલા અકસ્માતના કારણે પગમાં ફ્રેકચર થયું હોવાથી કોઇ કામ કરી શકતા ન હતા જેથી આ ચિંતાના કારણે ઝેરી દવા પીને આપઘાત કરી લેતા શોકની લાગણી ફેલાઇ ગઇ છે.
જોડીયા તાલુકાના પીઠડ ગામમાં રહેતા સેવનબાઇ કરણભાઇ મકવાણા (ઉ.વ.૪૭)નું આશરે ત્રણેક મહિના પહેલા એકસીડન્ટ થયુ હતું જેમાં પગમાં ફ્રેકચર આવતા પોતે કોઇ કામ કરી શકતા ન હોય જેના કારણે ચિંતામાં રહેતા હતા.
આ બાબતનું મનમાં લાગી આવતા પોતે ભાગમાં રાખેલ વાડીએ પોતાની મેળે કપાસમાં છાંટવાની જંતુનાશક દવા પી લેતા ધ્રોલ સરકારી હોસ્પીટલમાં સારવાર માટે લઇ જવામાં આવેલ જયાં તેણીનું મૃત્યુ નિપજયુ હતું આ બનાવ અંગે કરણ તેજસીંગભાઇ દ્વારા જોડીયા પોલીસમાં જાણ કરવામાં આવી હતી.
***
સર્પદંશ થતા રાજપરાના વૃદ્ધનું મૃત્યુ
ઓખા મંડળના મીઠાપુર તાબેના રાજપરા ગામે રહેતા નથુભા લાલાભા માણેક નામના ૬૦ વર્ષના હિન્દુ વાઘેર વૃદ્ધને રવિવારે તેમની વાડીએ ઝેરી સર્પે દંશ દેતા તેમનું મૃત્યુ નીપજ્યું હતું. આ અંગેની જાણ મૃતકના પુત્ર રાણાભા નથુભા માણેકએ મીઠાપુર પોલીસને કરી છે.