અમદાવાદમાં વિશ્વ વિખ્યાત બેન્ડ કોલ્ડપ્લેના કારણે અમદાવાદમાં હોટલોના ભાવ આસમાને ચઢી ગયા છે. આગામી 25 જાન્યુઆરીએ નરેન્દ્ર મોદી સ્ટેડિયમમાં યોજાનારા આ કોન્સર્ટને કારણે શહેરમાં હોટલોની માંગમાં ભારે વધારો થયો છે. પરિણામે હોટલોએ પોતાના રૂમના ભાવમાં ધરખમ વધારો કરી દીધો છે.

સૂત્રોના જણાવ્યા મુજબ કોલ્ડપ્લેના કોન્સર્ટને કારણે ફાઇવ સ્ટાર હોટલોને સૌથી વધુ ફાયદો થઈ રહ્યો છે. આ હોટલોએ પોતાના રૂમના ભાવ બમણાથી વધારી દીધા છે. માત્ર ફાઇવ સ્ટાર જ નહીં, પરંતુ ફોર સ્ટાર અને થ્રી સ્ટાર હોટલોએ પણ પોતાના રૂમના ભાવમાં 30 થી 40 ટકાનો વધારો કર્યો છે.

અમદાવાદમાં હાલ લગ્નની સીઝન ચાલી રહી હોવાથી હોટલો પાસે પહેલેથી જ 50 ટકા જેટલું બુકિંગ થઈ ગયું હતું. કોલ્ડપ્લેના કોન્સર્ટને કારણે હવે બાકીનું 50 ટકા બુકિંગ પણ ઝડપથી થઈ રહ્યું છે. પરિણામે, હોટલોને કોઈપણ પ્રકારની મુશ્કેલી વગર પોતાના રૂમના ભાવ વધારવાની તક મળી છે.

કોલ્ડપ્લેના કોન્સર્ટને કારણે અમદાવાદમાં હોટલોના ભાવ વધવાની સાથે સાથે ફ્લાઇટના ભાવમાં પણ વધારો થયો છે. કોન્સર્ટ જોવા માટે અમદાવાદ આવનારા લોકોને હવે વધુ પૈસા ખર્ચવા પડશે.