દેશના વિવિધ રાજ્યોમાં સક્રિય નક્સલવાદીઓ અથવા માઓવાદીઓને ખતમ કરવામાં સુરક્ષા દળોને આજે ગુરુવારે મોટી સફળતા મળી છે. મળતી માહિતી અનુસાર, તેલંગાણાના ભદ્રાદ્રી કોઠાગુડેમ જિલ્લામાં પોલીસ સાથેની અથડામણમાં 6 માઓવાદીઓ માર્યા ગયા અને બે સુરક્ષાકર્મીઓ ઈજાગ્રસ્ત થયા છે. પોલીસ સૂત્રો દ્વારા આપવામાં આવેલી માહિતી મુજબ, આ જવાનમાંથી એકની હાલત ગંભીર છે અને તેની સારવાર ચાલી રહી છે.

ગુરુવારે સવારે એન્કાઉન્ટર

તેલંગાણા રાજ્યના ભદ્રાદ્રી કોઠાગુડેમ જિલ્લાના અધિક્ષક રોહિત રાજે માહિતી આપી હતી કે, 5 સપ્ટેમ્બર ગુરુવારના રોજ સવારે ભદ્રાદ્રી કોઠાગુડેમ જિલ્લામાં પોલીસ અને માઓવાદીઓ વચ્ચે અથડામણ થઈ હતી. થોડા સમય પછી માહિતી સામે આવી કે આ એન્કાઉન્ટરમાં 6 નક્સલવાદીઓ માર્યા ગયા છે. તેમજ બે જવાનો પણ ઈજાગ્રસ્ત થયા છે.

 આ ઘટના જિલ્લાના જંગલ વિસ્તારમાં બની હતી

પોલીસે આ ઘટના અંગે માહિતી આપી છે કે ગોળીબારમાં માઓવાદી સંગઠનના છ કેડર માર્યા ગયા છે. પોલીસે જણાવ્યું કે, આ ઘટના જિલ્લાના જંગલ વિસ્તારમાં બની હતી. આ બનાવ અંગે પોલીસે વધુ તપાસ ચાલુ હોવાનું જણાવ્યું છે.

અગાઉ છત્તીસગઢમાં 9 નક્સલવાદીઓ કરાયા ઠાર

મંગળવારે છત્તીસગઢના દંતેવાડામાં પણ સુરક્ષાદળોને સફળતા મળી હતી. મળતી માહિતી મુજબ, અહીં એન્કાઉન્ટરમાં 9 નક્સલવાદીઓ માર્યા ગયા હતા. આઈજી બસ્તર પી. સુંદરરાજે જણાવ્યું હતું કે, સીઆરપીએફ અને છત્તીસગઢ પોલીસ અને ડીઆરજીએ દંતેવાડા વિસ્તારમાં નક્સલવાદીઓ સાથે એન્કાઉન્ટર કર્યું હતું. આ પહેલા ગત અઠવાડિયે પણ નક્સલ પ્રભાવિત નારાયણપુર જિલ્લામાં સુરક્ષા દળોએ ત્રણ મહિલા નક્સલવાદીઓને માર્યા હતા.