આર અશ્વિનના ચાહકો માટે ગઈકાલનો દિવસ ખૂબ જ ઈમોશનલ રહ્યો હતો. તેના ફેવરિટ ઓફ સ્પિનર, ભારતીય ક્રિકેટ ટીમના અનુભવી ખેલાડી આર અશ્વિને સોશિયલ મીડિયા પર નિવૃત્તિની જાહેરાત કરી હતી. તેની પોસ્ટ જોયા બાદ ક્રિકેટપ્રેમીઓ સિવાય બોલિવૂડ સ્ટાર્સે પણ પોસ્ટ કરી હતી.

આ સમાચાર પછી તેના મિત્ર અને બેટ્સમેન વિરાટ કોહલીએ તેના માટે એક લાંબી પોસ્ટ શેર કરી છે. વિરાટ કોહલી બાદ હવે તેની પત્ની અને બોલિવૂડ અભિનેત્રી અનુષ્કા શર્માએ પણ આર અશ્વિનની નિવૃત્તિ બાદ એક ખૂબ જ સુંદર નોટ અને વીડિયો શેર કર્યો છે.

અનુષ્કા શર્માએ આર અશ્વિનની નિવૃત્તિ પર કહી આ વાત

અનુષ્કા શર્મા ભલે ફિલ્મોથી દૂર હોય પરંતુ તે સોશિયલ મીડિયા પર દરરોજ કોઈને કોઈ પોસ્ટ શેર કરતી રહે છે. તાજેતરમાં જ તેણે પોતાના ઓફિશિયલ ઈન્સ્ટાગ્રામ પર ભારતીય ક્રિકેટર આર અશ્વિનની નિવૃત્તિ પર એક પોસ્ટ શેર કરી છે.

ઈન્સ્ટા સ્ટોરી પર ટીમ ઈન્ડિયાનો ટ્રીબ્યુટ વીડિયો શેર કરતી વખતે લખ્યું "રવિચંદ્રન અશ્વિન, એક લાસ્ટિંગ લેગેસી" આ પોસ્ટમાં, અનુષ્કા શર્માએ માત્ર ક્રિકેટરને જ નહીં પરંતુ તેની પત્ની પ્રીતિ નારાયણનને પણ ટૅગ કર્યા અને સ્મિત અને હૃદયવાળું ઈમોજી પોસ્ટ કર્યું.

અનુષ્કા શર્મા પહેલા વિરાટ કોહલીએ એક ઈમોશનલ પોસ્ટ લખી હતી

અનુષ્કા શર્મા પહેલા વિરાટ કોહલીએ પોતાના એક્સ એકાઉન્ટ પર એક ઈમોશનલ પોસ્ટ શેર કરી હતી, જેમાં લખ્યું હતું કે, "હું તમારી સાથે 14 વર્ષ સુધી ક્રિકેટ રમ્યો છે અને જ્યારે તમે મને કહ્યું કે તમે નિવૃત્તિ લઈ રહ્યા છો, ત્યારે હું થોડો ભાવુક થઈ ગયો હતો અને તે બધી ક્ષણો મારી સામે આવી જ્યારે આપણે સાથે રમ્યા હતા. અશ્વિન મેં તમારી સાથે મારી મુસાફરીની દરેક ક્ષણનો આનંદ માણ્યો છે. તારી સ્કિલ્સ અને મેચ જીતાડવાનું યોગદાન બેમિસાલ છે. તમને ભારતના દિગ્ગજ ક્રિકેટર તરીકે યાદ કરવામાં આવશે, તમને અને તમારા પરિવારને ખૂબ પ્રેમ.

અનુષ્કા શર્માને ફિલ્મી પડદે જોવાની રાહ

2008માં શાહરૂખ ખાન સાથેની ફિલ્મ 'રબ ને બના દી જોડી'થી બોલિવૂડમાં એન્ટ્રી કરનાર અનુષ્કા શર્મા લાંબા સમયથી મોટા પડદાથી દૂર છે. હાલમાં તે પોતાનો સંપૂર્ણ સમય વિરાટ કોહલી અને તેના બાળકો વામિકા અને અકાયને ફાળવી રહી છે. જો કે હવે તેના ફેન્સ તેને ફરીથી સ્ક્રીન પર જોવા માટે ઉત્સુક બની રહ્યા છે.

અનુષ્કા શર્માએ થોડાં વર્ષો પહેલાં તેની ફિલ્મ 'ચકદા એક્સપ્રેસ'ની જાહેરાત કરી હતી, જેમાં તે મહિલા ક્રિકેટર ઝુલન ગોસ્વામીની ભૂમિકા ભજવી રહી હતી પરંતુ નેટફ્લિક્સ પર રિલીઝ થનારી આ ફિલ્મ સ્થગિત કરવામાં આવી હતી.