ગેસના બાટલા સહિત 17 હજારની સામગ્રી કબ્જે લેતી પોલીસ

કલ્યાણપુર તાલુકાના લાંબા ગામે રહેતા ચંદ્રકાંતભાઈ ઉર્ફે ચિરાગભાઈ ભગવાનજીભાઈ કાનાણી નામના 37 વર્ષના યુવાન દ્વારા પોતાના રહેણાંક મકાનમાં ગેરકાયદેસર રીતે રાંધણ ગેસ ભરેલા બાટલામાં રહેલો ગેસ ખાલી કરીને અન્ય બાટલામાં રિફિલિંગ કરી, અને તેનું અનઅધિકૃત રીતે વેચાણ કરવામાં આવતું હોવાનું ખુલવા પામ્યું છે.

જોખમી રીતે તેમજ કોઈપણ પ્રકારના સલામતીના સાધનો વગર અહીં થતી આ પ્રવૃત્તિ સામે એસ.ઓ.જી. પોલીસે કડક કાર્યવાહી કરી, આ સ્થળેથી પાંચ જેટલા ગેસ સિલિન્ડર ઉપરાંત ઈલેક્ટ્રીક મોટર, રબરની પાઇપ, રેગ્યુલેટર, લોખંડની નોઝલ વિગેરે મળી કુલ રૂપિયા 17,100 નો મુદ્દામાલ કબજે કરવામાં આવ્યો છે. આ પ્રકરણમાં એસ.ઓ.જી. વિભાગના એ.એસ.આઈ. ભીખાભાઈ ગાગીયાની ફરિયાદ પરથી કલ્યાણપુર પોલીસે ચંદ્રકાંતભાઈ ઉર્ફે ચિરાગભાઈ કાનાણી સામે ભારતીય ન્યાય સંહિતાની કલમ 287 મુજબ ગુનો નોંધી, આગળની કાર્યવાહી કરી હતી.