કેરળમાંથી એક અત્યંત જધન્ય ઘટના સામે આવી છે. અહીં એક 16 વર્ષની ખેલાડી પર તેના કોચ અને સાથી ખેલાડીઓએ 2 વર્ષથી વધુ સમય સુધી બળાત્કાર ગુજાર્યો હતો. આ કેસમાં ચાર સામે એફઆઈઆર નોંધવામાં આવી છે જયારે પોલીસે 6 લોકોની ધરપકડ કરી છે.આ કેસમાં 60 થી વધુ લોકો સંડોવાયેલા હોવાની શંકા છે. સમાચાર એજન્સીએ જણાવ્યું હતું કે, બે મહિના પહેલા જ 18 વર્ષની થયેલી આ છોકરીએ આરોપ લગાવ્યો છે કે તે 16 વર્ષની હતી ત્યારથી તેના પર ઘણી વખત બળાત્કાર થયો છે.બાળ કલ્યાણ સમિતિ દ્વારા આયોજિત કાઉન્સેલિંગ દરમિયાન આ મામલો પ્રકાશમાં આવ્યો હતો, જ્યારે એક શૈક્ષણિક સંસ્થામાં છોકરીના શિક્ષકોએ સમિતિને તેના વર્તનમાં નોંધપાત્ર ફેરફારો વિશે જાણ કરી હતી. કેરળ પોલીસે જણાવ્યું હતું કે પોલીસે નોંધેલી બે એફઆઈઆરના સંદર્ભમાં 5 લોકોની ધરપકડ કરવામાં આવી છે, જ્યારે અન્ય એક વ્યક્તિ પહેલાથી જ એક અલગ કેસમાં જેલમાં છે.

કેમ્પમાં ચાલતા હતા ગંદા કામ
પઠાણમથિટ્ટા બાળ કલ્યાણ સમિતિના અધ્યક્ષ રાજીવ એન.ના જણાવ્યા અનુસાર, સગીર છોકરીએ સૌપ્રથમ શાળાના કાઉન્સેલિંગ સત્ર દરમિયાન જાતીય શોષણ વિશે વાત કરી હતી, ત્યારબાદ બાળ કલ્યાણ સમિતિના હસ્તક્ષેપ બાદ પોલીસ કેસ નોંધવામાં આવ્યો હતો. કેરળના પઠાણમથિટ્ટામાં આ ખેલાડી પર તેના કોચ, સહપાઠીઓ અને સ્થાનિક રહેવાસીઓ દ્વારા રમતગમત શિબિરો સહિત વિવિધ સ્થળોએ આવા કૃત્યો કરવામાં આવ્યા હોવાનો આરોપ છે.  બાળ કલ્યાણ સમિતિના સભ્યોએ આરોપો સાચા છે કે નહીં તેની ખાતરી કરવા માટે છોકરીને મનોવિજ્ઞાની પાસે કાઉન્સેલિંગ માટે લઈ ગયા હતા. બાળ કલ્યાણ સમિતિના અધ્યક્ષે જણાવ્યું હતું કે આ મામલો અસામાન્ય હોવાનું સમજાયા પછી પોલીસને જાણ કરવામાં આવી હતી.