RBI દ્વારા 2000ની નોટ બંધ અંગેના લેવાયેલા નિર્ણયને લઇને રાજકોટના માર્કેટિંગ યાર્ડમાં વેપારીઓ ધરાર ખેડૂતોને 2000ની નોટ પકડાવી દેતા હોવાનું સામે આવ્યું છે. જેને લઇને ખેડુતો પણ મૂંઝવણમાં મુકાઇ ગયા છે. આ બાબતે રાજકોટ જિલ્લાના પ્રભારી અને કૃષિ મંત્રી રાઘવજી પટેલે નિવેદન આપ્યું છે. કોઈ વેપારી ધરાર ખેડૂતને 2 હજારની નોટ ન આપી શકે. આ બાબતે ચેરમેન સાથે પણ બેઠક બોલાવી સમસ્યાની નિરાકરણ કરવામાં આવશે.

મહત્વનું છે કે, ગત તા.23 મેથી બેંકમાં 2000ની નોટ બદલવાની કાર્યવાહી કરવામાં આવી રહી છે. લોકોની બેંક બહાર લાઈન પણ લાગેલી જોવા મળે છે. તેમ છતાં અમુક લોકો બેંક જવાના બદલે અન્ય સ્થળે 2 હજારની નોટ વટાવવાના પ્રયત્ન કરી રહ્યા છે. એવામાં યાર્ડમાં પણ વેપારીઓ ખેડૂતોને પેમેન્ટ કરવામાં 2000ની નોટ પકડાવી દેતા હોવાથી ખેડુતો મુશ્કેલીમાં મુકાયા છે. ત્યારે આ બાબતે હવે રાજકોટ જિલ્લાના પ્રભારી અને કૃષિમંત્રી યાર્ડના ચેરમેન જયેશ બોઘરા સાથે બેઠક બોલાવી, ખેડૂતોને મુશ્કેલી ન થાય તે પ્રકારનો નિર્ણય લેશે.