આમ તો અભિનેતા રિતેશ દેશમુખ ફિલ્મોમાં તેની કોમેડી ભૂમિકાઓ માટે વધુ જાણીતો છે. પરંતુ રિતેશ છેલ્લા કેટલાક સમયથી લોકોને ફિલ્મોમાં હસાવતો નથી. બલ્કે તે ડરાવે છે. જીહા, તે છેલ્લા કેટલાક સમયથી ફિલ્મોમાં વિલનની ભૂમિકામાં જોવા મળી રહ્યો છે. મજાની વાત તો એ છે કે જેમ તે પડદા પર કોમેડી રોલ ખૂબ સારી રીતે ભજવે છે તેમ તે વિલનની ભૂમિકા પણ સારી રીતે નિભાવી રહ્યો છે. ત્યારે હવે તે અજય દેવગણ સાથે ટક્કરાશે.

જીહા, હવે મોટા પડદા પર અજય દેવગણ અને રિતેશ દેશમુખની ટક્કર જોવા મળશે. આપણે જાણીએ છીએ કે, રાજકુમાર ગુપ્તાના નિર્દેશનમાં બની રહેલી 'રેઈડ 2'નું શૂટિંગ ચાલી રહ્યું છે. આ ફિલ્મમાં અજય દેવગણ લીડ રોલમાં જોવા મળશે. આ સિવાય રિતેશ દેશમુખ વિલનની ભૂમિકામાં હશે. એટલે રેઇડની આ સિકવલમાં બન્ને અભિનેતાઓ ટકરાવાના છે.

જો કે મોટા પડદા પર અજય દેવગણ અને રિતેશ દેશમુખ બન્ને કલાકારો પ્રથમ વખત એકસાથે કામ નથી કરી રહ્યા. બંને કલાકારો આ પહેલા પણ સાથે જોવા મળ્યા છે. અજય દેવગણ અને રિતેશ દેશમુખ ઈન્દ્ર કુમારની ફિલ્મ 'ટોટલ ધમાલ'માં કોમેડી કરતા જોવા મળ્યા હતા. ત્યારે 'રેઈડ 2'માં તેમનો રોલ 'ટોટલ ધમાલ' કરતા બિલકુલ અલગ છે. આ ફિલ્મમાં બંનેના પાત્રો એકબીજા સાથે ટકરાતા જોવા મળશે. આ તરફ રિતેશ દેશમુખ વિલનની ભૂમિકા ભજવવા માટે ખૂબ જ ઉત્સાહિત છે.

કહેવામાં આવે છે કે, આ ફિલ્મ 15 નવેમ્બર 2024ના રોજ મોટા પડદા પર રિલીઝ થશે. હાલમાં આ ફિલ્મનું શૂટિંગ ચાલી રહ્યું છે, જેનું શૂટિંગ એક-બે રાજ્યોમાં નહીં પરંતુ દિલ્હી, મુંબઈ, રાજસ્થાન, ઉત્તર પ્રદેશમાં મોટા પાયે થવાનું છે. આ ફિલ્મમાં અજય સાથે વાણી કપૂર ફીમેલ લીડમાં હશે.