સ્પેસએક્સના સ્થાપક એલોન મસ્ક મંગળ પર જીવન સ્થાપિત કરવાનો પ્રયાસ કરી રહ્યા છે. તેમના પ્રયાસો વચ્ચે મંગળ પર એક ચોંકાવનારો ખાડો જોવા મળ્યો છે. પ્રાચીન જ્વાળામુખીની બાજુમાં જોવા મળેલા આ રહસ્યમય ખાડાએ અવકાશ પ્રત્યે શોખીન લોકોમાં ઉત્તેજના ફેલાવી છે. એવું કહેવાય છે કે મંગળ પર ધૂળની ડમરીઓ અને તાપમાનમાં વધઘટ સામાન્ય છે. પરંતુ હવે આ ખાડો કેવી રીતે બન્યો તે જાણવા માટે દરેક લોકો ઉત્સુક છે.

નાસાના માર્સ રિકોનિસન્સ ઓર્બિટર (MRO) પર તૈનાત હાઇ-રિઝોલ્યુશન ઇમેજિંગ સાયન્સ એક્સપેરિમેન્ટ (HiRISE) કેમેરા દ્વારા કેપ્ચર કરાયેલ આ ખાડો હવે લુપ્ત થયેલા આર્શિયા મોન્સ જ્વાળામુખીની ધાર પર સ્થિત છે. આર્શિયા મોન્સ જ્વાળામુખીની શોધ ઓગસ્ટ 2022 માં થઈ હતી. ઘણીવાર એવું બને છે કે જ્વાળામુખીમાંથી નીકળતો લાવા મોટા છિદ્રો બનાવે છે. જ્વાળામુખીની બાજુઓ પર વિવિધ છિદ્રો જોવાનું સામાન્ય છે, પરંતુ આ ખાડો થોડો અલગ લાગે છે.

જો કે હજુ સુધી એ વાતની પુષ્ટિ થઈ નથી કે આ મોટું છિદ્ર કઈ રીતે બન્યું. જો મંગળ ચંદ્ર અથવા પૃથ્વી જેવો છે, તો આ વિશાળ લાવા ક્રેટર્સ ઉજ્જડ ગ્રહ પર માનવ વસાહતો માટે આશ્રય પ્રદાન કરી શકે છે. વૈજ્ઞાનિકોનું માનવું છે કે જો ભવિષ્યમાં મનુષ્ય મંગળ પર જશે તો આ ખાડાઓની અંદર તેમની વસાહતો સ્થાપિત થઈ શકે છે.