રાહુલ ગાંધીના સમર્થનમાં રાજ્યભરમાં કોંગ્રેસ વિરોધ કરી રહી છે. ત્યારે આજે રાજકોટમાં ફરી એક વખત રાજકોટ શહેર કોંગ્રેસ અનુસૂચિત જાતિ વિભાગ દ્વારા રોષ સાથે વિરોધ કરવામાં આવ્યો હતો. પોલીસે વિરોધ કરી રહેલા તમામ આગેવાન અને કાર્યકરોની અટકાયત કરી હતી. 

માનહાની કેસમાં રાહુલ ગાંધીને 2 વર્ષની સજા થયા બાદ રાહુલ ગાંધીનું સાંસદ તરીકેનું સભ્ય પદ રદ થયુ છે. 2019માં મોદી સરનેમ કેસમાં સુરત સેશન્સ કોર્ટે તેને દોષિત ઠેરવ્યો હતો. જે પછી હવે રાહુલ ગાંધીએ તેમનું લોકસભાનું સંસદ પદ ગુમાવ્યુ છે. જેને લઇને કોંગ્રેસમાં રોષ ફાટી નીકળ્યો છે. સમગ્ર રાજ્યમાં આ મુદ્દે કોંગ્રેસના નેતાઓ, કાર્યકરો અને આગેવાનો વિરોધ કરી રહ્યા છે. ત્યારે આજે રાજકોટ શહેરમાં જયુબેલી ચોક નજીક આવેલી મહાત્મા ગાંધીની પ્રતિમા નજીક રાજકોટ શહેર કોંગ્રેસ અનુસૂચિત જાતિ વિભાગ દ્વારા વિરોધ કરવામાં આવ્યો હતો. નારેબાજી સાથે પોતાનો રોષ વ્યક્ત કરી રહેતા કોંગ્રેસના તમામ આગેવાનો અને કાર્યકરોની પોલીસે અટકાયત કરી હતી.