રેસલિંગ ફેડરેશન ઓફ ઈન્ડિયા (WFI)ના વડા અને યૌન ઉત્પીડનના આરોપી બ્રિજ ભૂષણ સિંહે વિરોધ કરી રહેલા કુસ્તીબાજો પર નવો આરોપ લગાવ્યો છે. તેણે કહ્યું કે બજરંગ પુનિયાએ કોઈને POCSO એક્ટ હેઠળ ઉત્પીડનનો આરોપ લગાવવા માટે "છોકરીની વ્યવસ્થા" કરવા કહ્યું હતું.

નોંધનીય છે કે છેલ્લા કેટલાક દિવસથી વિનેશ ફોગાટ, સાક્ષી મલિક અને બજરંગ પુનિયા સહિત અનેક ટોચના કુસ્તીબાજો દિલ્હીના જંતર-મંતર ખાતે બ્રિજભૂષણ સિંહની ધરપકડ અને ફેડરેશનમાંથી હાંકી કાઢવાની માંગ સાથે વિરોધ પ્રદર્શન કરી રહ્યા છે.

કુસ્તીબાજોએ એક સગીર સહિત બ્રિજભૂષણ સિંહ વિરુદ્ધ બે FIR નોંધાવી છે. દિલ્હી પોલીસે ફરિયાદના આધારે તેમની વિરુદ્ધ કેસ નોંધ્યા પછી પણ સિંહે કોઈ ગેરરીતિનો ઇનકાર કર્યો છે. બ્રિજ ભૂષણે એક ન્યૂઝ એજન્સીને જણાવ્યું કે, હું એવી સગીર છોકરીને ઓળખતો નથી જેણે મારા પર આરોપો લગાવ્યા છે.

બ્રિજભૂષણ સિંહે કહ્યું કે, મામલાની તપાસ માટે રચાયેલી મોનિટરિંગ કમિટીની સામે સગીર યુવતીએ જુબાની પણ આપી ન હતી. મેં સમિતિને એક ઓડિયો ક્લિપ સુપરત કરી હતી જેમાં બજરંગ પુનિયા એક વ્યક્તિને છોકરીની વ્યવસ્થા કરવા માટે કહી રહ્યો હતો. હવે ત્રણ મહિના પછી આ આરોપ સામે આવ્યો છે.
​​​​​​​

તેમણે આક્ષેપને પુનરોચ્ચાર કર્યો કે વિરોધ રાજકીય પ્રેરિત હતો. WFIના વડાએ દાવો કર્યો હતો કે "શાહીન બાગ અને ખેડૂતોના વિરોધમાં સક્રિય રહેલા દળો" ફરી દેખાય છે. બીજેપી સાંસદ બ્રિજ ભૂષણે કહ્યું, "હું માત્ર એક બહાનું છું, તેમનું નિશાન પાર્ટી (ભાજપ) છે."