સુપર 30ના સ્થાપક આનંદ કુમારને 2024 માટે દક્ષિણ કોરિયા ટુરિઝમના માનદ એમ્બેસેડર તરીકે નિયુક્ત કરવામાં આવ્યા છે. બુધવારે નવી દિલ્હીમાં આ કરાર પર હસ્તાક્ષર કરવામાં આવ્યા હતા. આનંદ કુમાર કોરિયા ટુરિઝમ ઓર્ગેનાઈઝેશન (KTO)ના સિઓલ કાર્યાલય ખાતે સત્તાવાર હોદ્દો સમારોહ માટે દક્ષિણ કોરિયાની પણ મુલાકાત લેશે.

KTOના ભારત અને સાર્ક દેશોના પ્રાદેશિક નિર્દેશક મ્યોંગ કિલ યુને જણાવ્યું હતું કે, 'આનંદ કુમાર જેઓ તેમની અગ્રણી સુપર 30 પહેલના કારણે દક્ષિણ કોરિયામાં ખૂબ જ લોકપ્રિય છે, તેમના જીવન પર કોરિયન ભાષામાં પ્રકાશિત પુસ્તક તે બેસ્ટ સેલર રહ્યું છે. બોલિવૂડ સ્ટાર રિતિક રોશન અભિનીત ફિલ્મ સુપર-30 આનંદ કુમારના જીવન પરથી બનાવવામાં આવી હતી.

કોરિયા સુપર 30 માટે કરી શકાય છે અરજી

તેમણે કહ્યું કે, શિક્ષણ ક્ષેત્રે આનંદ કુમારની પહેલ પ્રતિભાશાળી વિદ્યાર્થીઓને દક્ષિણ કોરિયા દ્વારા ઓફર કરવામાં આવતી તકો શોધવા માટે પ્રોત્સાહિત કરશે. તેમણે કહ્યું કે, 'તે ભારતીયોને વિશેષ રૂપથી 14-18 વર્ષની વયજૂથના વિદ્યાર્થીઓને, કોરિયાની જીવંત સંસ્કૃતિ, ઐતિહાસિક સ્થળો અને સ્વાદિષ્ટ ભોજનની શોધ કરવાની અને કાયમી યાદો બનાવવાની તક પૂરી પાડશે. માતા-પિતા પણ અરજી ફોર્મ ભરીને તેમના બાળકોને કોરિયા સુપર 30 પ્રોગ્રામ માટે નોંધણી કરાવી શકે છે.

કોરિયા ટુરીઝમના માનદ એમ્બેસેડર તરીકે આનંદ કુમારની પસંદગી સાંસ્કૃતિક આદાનપ્રદાન અને વિદ્યાર્થીઓ માટે ખુલ્લા માર્ગો દ્વારા કોરિયા સાથેના સંબંધોને પ્રોત્સાહન આપવા માટે નોંધપાત્ર છે. સાઉથ કોરિયા પણ વિદ્યાર્થીઓ માટે કોરિયા સુપર 30 ટ્રાવેલ પેકેજ લઈને આવ્યું છે જેથી તેઓ કોઈપણ મુશ્કેલી વિના દેશની મુલાકાત લઈ શકે અને તકોનું અન્વેષણ કરી શકે અને સંસ્કૃતિથી પરિચિત થઈ શકે.

મારા માટે નવો અનુભવ: આનંદ કુમાર

આનંદ કુમારે આ પ્રસંગે જણાવ્યું હતું કે, વિદ્યાર્થીઓને આધુનિક સમયમાં ટેકનોલોજીની રીતે અદ્યતન દેશનો જરૂરી અનુભવ આપવા માટે આ એક સારી પહેલ છે. તેમને કહ્યું કે, 'આંતરરાષ્ટ્રીય સ્તરે વિદ્યાર્થી વિનિમય કાર્યક્રમનો ભાગ બનવું મારા માટે એક નવો અનુભવ હશે. આધુનિક સમયમાં અંતરથી કોઈ ફરક પડતો નથી. હું આ નવા અભિયાનની રાહ જોઈ રહ્યો છું.

આનંદ કુમારે કહ્યું કે, કોરિયન ટુરિઝમના માનનીય રાજદૂત બનવું એ માત્ર તેમની જ નહીં પરંતુ ભારતના તમામ શિક્ષકોની ઓળખ છે. તેમને કહ્યું કે, 'તે દક્ષિણ કોરિયા જેવા શૈક્ષણિક રીતે અદ્યતન રાષ્ટ્ર દ્વારા શિક્ષકોને આપવામાં આવતા સન્માનને પણ દર્શાવે છે.'