અકસ્માતના આ બનાવની જાણવા મળતી વિગતો મુજબ, કુતિયાણા તાલુકાના મોળવદર ગામે રહેતો વિજય રવજીભાઈ સોલંકી નામનો યુવાન ગઈકાલે સવારના બાઈક લઈને ઘરેથી ઉપલેટા જતો હતો ત્યારે ઉપલેટા નજીક પોરબંદર-ઉપલેટા નેશનલ હાઈવે રોડ પર ગણોદના પાટીયા પાસે દ્વારકેશ હોટેલ નજીક તેનું બાઈક ડિવાઈડર સાથે અથડાતા તેને ગંભીર ઈજા પહોંચી હતી. જેથી તેને સારવાર માટે ઉપલેટા સરકારી હોસ્પિટલ ખસેડવામાં આવ્યો હતો. અહીં ફરજ પરના તબીબે જોઈ તપાસી યુવાનને મૃત જાહેર કર્યો હતો.

અકસ્માતના આ બનાવની વધુમાં જાણવા મળતી વિગતો મુજબ, અકસ્માતમાં મોતની ભેટનાર વિજય બે બહેનનો એકનો એક ભાઈ હતો. યુવાન ટ્રકમાંથી કામ કરતો હતો મંગળવારે સાંજના તે ઉપલેટાથી કોઈનું બાઈક લઈને ઘરે આવ્યો હતો ત્યારબાદ ગઈકાલ સવારે આ બાઈક પરત આપવા માટે જતો હતો. દરમિયાન અકસ્માત નડતા તેનું મોત થયું હતું. બનાવના પગલે યુવાનના પરિવારમાં કલ્પાંત છવાયો હતો. બીજી તરફ અકસ્માતના બનાવને લઇ ઉપલેટા પોલીસે જરૂરી કાર્યવાહી કરી હતી.