અકસ્માતના આ બનાવની જાણવા મળતી વિગતો મુજબ, મૂળ મધ્ય પ્રદેશના ધાર જિલ્લાના કટારપુરા ગામના વતની અને હાલ પખવાડિયાથી અહીં પડધરી પાસે નાની અમરેલી ગામ નજીક આવેલા નીલકંઠ પેપરમીલની ઓરડીમાં રહેતા સરદાર બલિયા ગેહલોત (ઉ.વ 23) નામના યુવાને પડધરી પોલીસ સ્ટેશનમાં નોંધાવેલી ફરિયાદમાં આરોપી તરીકે જેસીબી લોડર નંબર જીજે 3 એચ.પી 5927 ના ચાલક અજય ઉર્ફે કાલીયાનું નામ આપ્યું છે.

યુવાને ફરિયાદમાં જણાવ્યું હતું કે, તેઓ પાંચ ભાઈ બે બહેનનો પરિવાર ધરાવે છે. જેમાં જીતેન્દ્ર(ઉ.વ 22) વચેટ હતો. યુવાન તેનો ભાઈ રાહુલ અને જીતેન્દ્ર અહીં ઓરડીમાં સાથે રહે છે. ગઈકાલે સવારના યુવાનને તેના ભાઈ રાહુલે જણાવ્યું હતું કે જીતેન્દ્ર પર લોડર ચડી જતા તેને ઈજા પહોંચી છે. જેથી યુવાન દોડીને અહીં પહોંચ્યો હતો.

બાદમાં તેને માલુમ પડ્યું હતું કે જીતેન્દ્રની નાઈટ ડ્યુટી હોય દરમિયાન તે અહીં પૂંઠાના ઢગલા પર પૂઠું ઓઢી સૂતો હતો લોડર ચાલક અજય ઉર્ફ કાલીયા અહીં લોડરથી પૂઠા ભરતો હતો દરમિયાન જીતેન્દ્ર પર આ લોડર ફરી વળ્યું હતું. જેથી તેને ગંભીર ઈજા પહોંચતા તે અહીં ઇજાગ્રસ્ત હાલતમાં બેભાન પડ્યો હતો. 108ના ઇએમટી અહીં આવી જોઈ તપાસી યુવાનને મૃત જાહેર કર્યો હતો. બનાવ અંગે યુવાનની ફરિયાદ પરથી પડધરી પોલીસે જેસીબી લોડરના ચાલક વિરુદ્ધ ગુનો નોંધી કાયદેસરની કાર્યવાહી કરી હતી. બનાવાની વધુ તપાસ પીએસઆઇ વી. કે. સુરાણી ચલાવી રહ્યા છે.