ગારીયાધાર તાલુકાના મોરબા ગામમાં રહેતા દંપતિ પર બે મહિલા સહિતના પાંચ શખ્સોએ ધારીયા,  કુહાડી અને લાકડીથી હુમલો કર્યો હતો. ઉશ્કેરાઇ ગયેલા એક શખ્સે  હુમલો કરી બાઈકનો બોથો તોડી નાંખ્યો હતો તો કારના કાચ પણ તોડી નાંખ્યા હતા. ગારીયાધાર પોલીસે આ બનાવ અંગે આરોપીઓ સામે ગુનો દાખલ કરી વધુ તપાસ હાથ ધરી હતી.
મોરબા ગામમાં રહેતા જીતુ ભીમાભાઈ વાઘેલાએ નોંધાવેલી  ફરિયાદમાં જણાવ્યું હતું કે  ભોલા હીરાભાઈ વાઘેલા, લતાબહેન ભોલાભાઈ વાઘેલા, હીરાભાઈ વાઘેલા, વિક્રમ વાઘેલા અને રૂડીબહેનએ બે  દિવસ પહેલા ફરિયાદી અને તેમના પત્નિ ઘરે હતા ત્યારે આરોપી ભોલાએ અને લતાએ "તુ કેમ અમારા ઘર પાસે આંટા મારે છે ?", તેમ કહેતા ફરિયાદીએ હુ તમારા ઘર પાસે આંટા નથી મારતો તેમ કહેતા આરોપી ભોલો ઉશ્કેરાઇ ગયો હતો અને તેણે ઘણથી હુમલો કરી ફરિયાદીની બાઇકનો બોથો તોડી નાંખ્યો હતો.
જ્યારે  આરોપી લતાબહેન કુહાડીથી હુમલો કરી ફરિયાદીની કારની બારીનો કાચ તેમજ આગળના કાચને નૂકશાન પહોંચાડયું હતું.દરમિયાનમાં અન્ય ત્રણ આરોપીઓ પણ આવી ગયા હતા અને તમામ આરોપીઓએ ફરિયાદીને મારી નાંખવાની ધમકી આપી ફરિયાદ તેમજ તેના પત્નિને માર માર્યો હતો.
આરોપી ભોલાએ ફરિયાદીને નાકના ભાગે બચકુ ભરી લઇ ઇંજા પહોંચાડી હતી તો લતાબહેન ફરિયાદીના પત્નિ ઉષાબહેનને ગળાના ભાગે બચકુ ભરી લઇ ઇંજા પહોંચાડી હતી.ગારીયાધાર પોલીસ દ્વારા આ બનાવ અંગે વિધીવત રીતે પોલીસ ફરિયાદ નોંધી વધુ તપાસ હાથ ધરવામાં આવી હતી.