પ્રમુખ પદ માટે અનુસૂચિત જાતિ બેઠક અનામત: હાલ ભાજપમાં એસસીના ત્રણ ઉમેદવારો ચુંટાયા 

ધ્રોલ નગર પાલિકાની ચૂંટણીમાં ભાજપ અને કોંગ્રેસ વચ્ચે જબરો જંગ જામ્યો હતો. ધ્રોલ પાલિકામાં હાલ ૭ વૉર્ડ અને ૨૮ બેઠકો છે. ચુંટણીના ત્રણેક દિવસ પહેલા વોર્ડ નં-૭ ના કોંગ્રેસ ઉમેદવારનું અવસાન થતાં વૉર્ડ ૭ ની ચુંટણી મોકુફ રાખવામાં આવી હતી. જ્યારે ૬ વોર્ડની ચુંટણી યોજાઈ હતી. જેમાં ભાજપને ૧૫, કૉંગ્રેસને ૮ અને એક અપક્ષ ઉમેદવાર વિજેતા થયાં છે. 

હાલ ધ્રોલ પાલિકામાં પ્રમુખપદ માટે અનુસૂચિત જાતિ અનામત બેઠક છે. ત્યારે હાલ ભાજપમાં ત્રણ અનુસુચિત જાતિના ઉમેદવારો ચુંટાયા છે. જેમાં વર્ષોથી ભાજપમાં વફાદારી પૂર્વક રહેલ મંગુબેન ચાવડા જે બીજી ટર્મ વિજેતા થયા છે. તેમજ તેમના પતિ નરશીભાઈ ચાવડા પણ અગાઉ બે ટર્મ ભાજપમાં કોર્પોરેટર રહી ચૂક્યા છે. નરશીભાઈ ચાવડાના પિતા પણ ધ્રોલ પાલિકામાં કોર્પોરેટર રહી ચૂક્યા છે. જે પરિવાર વર્ષોથી ભાજપમાં વફાદારી પૂર્વક કામ કરે છે. જ્યારે અન્ય ઉમેદવાર વિજયભાઈ ટપુભાઈ વાઘેલા અને બાલુબેન રવિકુમાર વાઘેલા અનુસૂચિત જાતિમાંથી ચૂંટાયેલ છે.

હાલ ભાજપમાં અનુસૂચિત જાતિના ત્રણ ઉમેદવાર ચુંટાયા છે. ત્યારે ધ્રોલ પાલિકા પ્રમુખનો તાજ કોના શિરે...? તેવી ચર્ચાએ જોર પકડયું છે.