વાંકાનેર શહેરમાં દિનપ્રતિદિન સતત ચોરીના બનાવો વધી રહ્યા છે. જેમાં મોટાભાગના બનાવોમાં પોલીસ ફરિયાદ થતી નથી ત્યારે વધુ એક ચોરીનો બનાવ સામે આવ્યો છે. જેમાં સીસીટીવી ફૂટેજ સહિતના સ્પષ્ટ પુરાવાઓને ધ્યાનમાં રાખી પોલીસ દ્વારા બે જવેલર્સની દુકાનમાંથી રૂ.૪.૫ લાખની કિંમતના સોનાના દાણાની વેપારીની નજર ચુકવી ચોરી કરવામાં આવતા ફરિયાદ નોંધવામાં આવી છે. 
​​​​​​​
બનાવની પ્રાપ્ત વિગત મુજબ વાંકાનેરની મેઈન બજારમાં બાલાજતી જવેલર્સ નામે સોનીકામની દુકાન ચલાવતા વેપારી યોગેશભાઈ રસિકભાઈ બારભાયાએ વાંકાનેર સીટી પોલીસમાં ફરિયાદ નોંધાવી છે. ગત તા.૨૬/૧૨ના ફરિયાદીની બાલાજતી જવેલર્સ દુકાનમાં સોનાના દાણાની ખરીદી કરવાના બહાને આવેલ ચારેક છોકરીઓ દ્વારા વેપારીની નજર ચુકવી રૂ.૧.૫ લાખની કિંમતના ૮૫ જેટલા સોનાના દાણાની ચોરી કરી હોય જે બાદ ગત તા.૨/૨/૨૪ના રોજ અગાઉના બનાવની જેમ ફરી આ પૈકીની ત્રણ છોકરીઓ દુકાનમાં સોનાના દાણાની ખરીદી કરવાના બહાને આવી ફરિયાદીના પિતાની નજર ચુકવી રૂ.૨ લાખની કિંમતના ૯૫ નંગ સોનાના દાણાની ચોરી કરી ફરાર થઈ ગયેલ. જેમાં બન્ને બનાવો સીસીટીવી કેમેરામાં સ્પષ્ટ દેખાતા હોય અને ફરિયાદીએ આજ સુધી તપાસ કરતા એકપણ છોકરીની ઓળખ મળી નહોતી. 

આ વચ્ચે ગત તા.૨૩/૨ના રોજ ફરિયાદીની દુકાનની બાજુમાં આવેલ સોની મનહરલાલ રતીલાલની દુકાનમાંથી પણ ઉપરોકત અજાણી છોકરીઓ આવી વેપારીની નજર ચુકવી રૂ.૧ લાખની કિંમતના ૨૫ નંગ સોનાના દાણાની ચોરી કરી લઈ ગઈ હતી. જેથી આ બનાવમાં ફરિયાદીએ વાંકાનેર સીટી પોલીસમાં જુદા જુદા ત્રણ સમયે બે જવેલર્સની દુકાનમાંથી વેપારીની નજર ચુકવી કુલ ૨૦૫ નંગ સોનાના દાણા જેની કિંમત રૂ.૪,૫૦,૦૦૦ની ચોરી કરી લઈ જતાં સીસીટીવી કેમેરામાં દેખાતી અજાણી છોકરીઓ સામે ફરિયાદ નોંધાવી છે.