શહેરના સાંઇબાબા સર્કલ પાસેથી સોલવન્ટ ચોકી તરફના રોડ પરથી યુપીના શખસને આજીડેમ પોલીસે પોણા બે કિલોના ગાંજાના જથ્થા સાથે ઝડપી લીધો હતો.પોલીસે આ શખસની પુછપરછ કરતા ગાંજો તેને કોઇ આપી ગયાનું રટણ કર્યું હતું.

ઉચ્ચ પોલીસ અધિકારીઓ દ્વારા શે નો ટુ ડ્રગ્સ મિશન અંતર્ગત નાર્કોટિકસ પદાર્થોનું ખરીદ અને વેચાણ કે સેવન કરનાર શખસો સામે કડક કાર્યવાહી કરવા સૂચના આપી હોય જેના પગલે આજીડેમ પોલીસ મથકના પીઆઇ એ.બી.જાડેજાની રાહબરી હેઠળ પીએસઆઇ જે.જી.રાણા તથા તેમની ટીમ પેટ્રોલીંગમાં હતી.દરમિયાન એએસઆઇ રવિભાઇ વાંક, હારૂનભાઇ ચાનીયાને મળેલી બાતમીના આધારે સાંઇબાબા સર્કલ પાસેથી સોલવન્ટ ચોકી તરફના રોડ પરથી એક શખસને શંકાસ્પદ હાલતમાં ઝડપી લીધો હતો.પોલીસે આ શખસની પુછતાછ કરતા તેણે પોતાનું નામ રવિકુમાર સાધુરામ યાદવ(ઉ.વ ૨૫ રહે. વિરાણી અઘાટ શેરી નં.૨ ઢેબર રોડ રાજકોટ, મૂળ યુપી) હોવાનું જણાવ્યું હતું.

આ શખસની અંગજડતી લેતા તેની પાસેથી રૂ.૧૭,૬૫૦ ની કિંમતનો ૧.૭૬૫ કિલો ગાંજો મળી આવ્યો હતો.જેથી પોલીસે ગાંજાનો આ જથ્થો અને મોબાઇલ ફોન અને બાઇક સહિત કુલ રૂ.૬૭,૬૫૦ નો મુદામાલ કબજે કરી કાયદેસરની કાર્યવાહી કરી હતી.આરોપી સામે આજીડેમ પોલીસ મથકના એનડીપીએસ એકટની કલમ હેઠળ ગુનો નોંધી જરૂરી કાર્યવાહી કરી હતી.આરોપીની પુછતાછ કરતા તેને કોઇ ગાંજો આપી ગયાનું રટણ કર્યું હતું.આરોપી ગાંજો કોની પાસેથી લાવ્યો હતો અને તે કેટલા સમયથી આ વેપલો કરે છે સહિતની બાબતો અંગે વધુ તપાસ થોરાળા પોલીસ મથકના પીએસઆઇ એમ.એસ.મહેશ્ર્વરી ચલાવી રહ્યા છે.