રાજકોટમાં અંબિકા ટાઉનશીપમાં સિદ્ધિ હાઇટ્સમાં રહેતા વેપારી પારસ સુરેશભાઈ મકવાણા દ્વારા ગોંડલ તાલુકા પોલીસ સ્ટેશનમાં નોંધાવવામાં આવેલી ફરિયાદમાં જણાવ્યું હતું કે તેમણે રીબડા પાસે સમૃદ્ધિ ઇન્ડસ્ટ્રીઝ ઝોનમાં શ્રી ગંગા ફોર્જીગ નામનું કારખાનુ યુનિટ અશોકભાઇ સાથે ભાગીદારીમાં શરૂ કર્યું છે જેનું કામ ચાલુ છે.

કારખાનામાં ફિટીંગ કરવાનો સમાન મંગાવ્યો હોય તા. 5/4/2025 ના રાત્રે કારખાનામાં મશીનરીની ફીટીંગ કરવાનો ખોલતા તેમાં મશીનની પીન, ગેર,સ્લાઇડર ગેરની કંગની, મોટર, સબમર્સીબલ કેબલ, વાયર સ્વીચ સહિતનો સામાન અહીં મૂકી રાત્રિના 11:00 કારખાનું બંધ કરી રહ્યા હતા. ત્યારબાદ બીજા દિવસે સવારે 9:30 વાગ્યે કારખાને આવતા કારખાને આ સામાન જોવા મળ્યો ન હતો અને તેની ચોરી થઈ ગઈ હોવાનું માલુમ પડ્યું હતું. જેથી તેમણે ભાગીદાર અશોકભાઈને ફોન કરી અહીં બોલાવ્યા હતા.

બાદમાં સીસીટીવી કેમેરા તપાસતા અજાણ્યા ત્રણ શખ્સો કારખાનામાં આવતા જોવા મળ્યા હતા. ત્યારબાદ અંદરથી સામાન લઈ નીકળતા હોવાનું પણ નજરે પડ્યું હતું. આજુબાજુમાં રિક્ષાના ટાયરના નિશાનો હતા. બાદમાં કારખાનેદારે તપાસ કરતા માલુમ પડ્યું હતું કે આ ઘટનાના એક બે દિવસ પૂર્વે બાજુમાં આવેલા નરેન્દ્રભાઈના કારખાનામાં પણ તસ્કરોએ ઘૂસી 600 કિલો જેટલી વજનની લોખંડની પ્લેટ ચોરી કરી ગયા હતા.

આમ રાત્રિના રિક્ષા લઈ આવેલા 3 અજાણ્યા શખસોએ ફરિયાદીના કારખાનામાંથી અલગ અલગ સામાન સહિત કુલ રૂપિયા 1 લાખની મત્તા તથા બાજુમાં આવેલા કારખાનામાંથી લોખંડની પ્લેટ 600 કિલો કિંમત રૂપિયા 20,000 મળી કુલ 1.20 લાખની મત્તા ચોરી કરી ગયા અંગે ગોંડલ તાલુકા પોલીસ સ્ટેશનમાં ફરિયાદ નોંધાવી હતી. પોલીસે આ મામલે ગુનો નોંધી સીસીટીવી ફૂટેજ ના આધારે આ તસ્કર ટોળકીને ઝડપી લેવા તપાસ હાથ ધરી છે.