પોરબંદરના જયુબેલી વિસ્તારમાં આવેલા હાથી કેમિકલ પાસે રહેતા ઇસમને તેના જુદા-જુદા ગુન્હા અનુસંધાને છ મહિના સુધી હદપાર કર્યો હતો,આમ છતાં તે જન્માષ્ટમીના તહેવાર દરમિયાન વતન આવીને જુગાર રમતો હતો,ત્યારે પોલીસે તેને બે ઈસમો સાથે પકડી લીધો હતો અને તેની સામે બે ગુન્હા નોંધ્યા છે.
પોરબંદરના હાથી કેમિકલ વિસ્તારમાં રહેતા કાના ઉર્ફે કારો મોહન વાઘેલાને તેના અનેક ગુન્હાઓ અનુસંધાને પોરબંદરના જિલ્લા સબ ડિવિઝનલ મેજિસ્ટ્રેટ દ્વારા તા.૩૦.૫.૨૦૨૪  થી ૬ મહિના સુધી પોરબંદર જિલ્લામાંથી હદપાર કર્યો હતો,આમ છતાં જન્માષ્ટમીના તહેવારો દરમિયાન તે પોતાના વતનમાં આવીને ઘર પાસે જાહેરમાં જુગાર રમી રહ્યો હતો,ત્યારે ઉદ્યોગનગર પોલીસે દરોડો પાડ્યો હતો અને કાના ઉર્ફે કારો મોહન વાઘેલા નામના આ ઈસમ ઉપરાંત એ જ વિસ્તારના પ્રકાશ વીરજી મકવાણા અને બાલુ હેમુ પરમારને પકડીને ૧૨૨૪૦ ની રોકડ તથા ગંજીપત્તાના પાના પણ કબ્જે કર્યા હતા તેમ જ કાના ઉર્ફે કારો સામે પોલીસે બે ગુન્હા નોંધ્યા છે.