જમ્મુ-કાશ્મીરના પહેલગામમાં પ્રવાસીઓ પર થયેલા આતંકવાદી હુમલામાં ભોગ બનેલા પરિવારો પ્રત્યે ગુજરાત સરકારે ઊંડી સંવેદના વ્યક્ત કરી છે. રાજ્ય સરકારે આ દુઃખદ ઘટનામાં જીવ ગુમાવનાર ગુજરાતના પ્રવાસીઓના પરિવારજનોને રૂપિયા 5 લાખની સહાય આપવાની જાહેરાત કરી છે. આ ઉપરાંત, હુમલામાં ઈજાગ્રસ્ત થયેલા રાજ્યના પ્રવાસીઓને પણ રૂપિયા 50,000 ની સહાય આપવામાં આવશે. ગુજરાત સરકાર આ મુશ્કેલ સમયમાં પીડિત પરિવારોની પડખે મક્કમતાથી ઊભી છે અને તેમને શક્ય તમામ મદદ કરવા માટે પ્રતિબદ્ધ છે.

પહલગામમાં થયેલા આતંકવાદી હુમલાની પૃષ્ઠભૂમિમાં, ભારતે પાકિસ્તાન સામે અત્યંત કડક પગલાં લીધા છે. કેન્દ્રીય કેબિનેટ સુરક્ષા સમિતિ (CCS)ની તાત્કાલિક બેઠક બાદ ઘણા મોટા નિર્ણયો લેવામાં આવ્યા છે, જે ભારત અને પાકિસ્તાનના સંબંધોને એક નવા તણાવપૂર્ણ તબક્કામાં લઈ જઈ શકે છે.