ગોંડલ-કોટડા સાંગાણી રોડ પર ગત ૧૮ જુલાઈની સાંજે એક અત્યંત કાળજું કંપાવી દેનારો અકસ્માત સર્જાયો હતો. એક પૂરપાટ ઝડપે આવી રહેલી બ્રેઝા કાર અને એક્ટિવા વચ્ચે થયેલી ધડાકાભેર ટક્કરમાં બે સગા મામા-ફઈના ભાઈઓના ઘટનાસ્થળે જ કરુણ અને કમકમાટીભર્યા મોત નીપજ્યાં હતા. હસતાં-રમતાં બે વહાલસોયા દીકરાઓના અકાળે અકસ્માતમાં મોતના સમાચાર મળતા જ પરમાર અને ચૌહાણ પરિવાર પર જાણે આભ તૂટી પડ્યું છે. આ હૃદયદ્રાવક ઘટનાને પગલે બંને પરિવારો સહિત સમગ્ર પંથકમાં ભારે અરેરાટી સાથે શોકની કાલીમા છવાઈ ગઈ છે.

ટ્યુશન ક્લાસ પતાવી ઘરે પરત ફરતા નડ્યો કાળ

મળતી વિગતો મુજબ, કોટડા સાંગાણી ખાતે રહેતો ૧૫ વર્ષનો દર્શીત રાજેશભાઈ ચૌહાણ ગોંડલ ખાતે કમ્પ્યુટર ક્લાસમાં ભણવા માટે આવ્યો હતો. સાંજે ટ્યુશન ક્લાસ પૂર્ણ થયા બાદ તે ગોંડલના સહજાનંદ નગરમાં રહેતા તેના મામા ઇન્દ્રજીતભાઈના ઘરે ગયો હતો. ત્યાંથી દર્શીત અને તેનો મામાનો દીકરો હેમેન્દ્ર (ઉં.વ. ૧૨) બંને એક્ટિવા મોપેડ લઈને કોટડા સાંગાણી જવા માટે નીકળ્યા હતા. સાંજે આશરે ૮ વાગ્યાની આસપાસ તેઓ જ્યારે કોટડાસાંગાણી નજીક પહોંચ્યા, ત્યારે રોડ પર સાવ અંધારપટ હતો. આ દરમિયાન એક જોખમી વળાંક પાસે સામેથી બેફામ સ્પીડે આવી રહેલી સફેદ કલરની બ્રેઝા કારે તેમના એક્ટિવાને જોરદાર ટક્કર મારી હતી.

૧૦૦ મીટર સુધી ઢસડાયું એક્ટિવા, ઘટનાસ્થળે જ નીપજ્યા મોત

આ અકસ્માત એટલો ભયાનક હતો કે, કારની જોરદાર અડફેટે આવ્યા બાદ એક્ટિવા રોડ પર આશરે ૧૦૦ મીટર જેટલું ઘસડાયું હતું. ટક્કરની તીવ્રતા એટલી વધારે હતી કે એક્ટિવા અને કારના સ્પેરપાર્ટ્સ હવામાં ઉડીને રોડ પર ફંગોળાયા હતા અને વાહનોનો કચ્ચરઘાણ વળી ગયો હતો. આ ભયાનક દુર્ઘટનામાં ગંભીર ઇજાઓ થવાના કારણે બંને કિશોરોના ઘટનાસ્થળે જ શ્વાસ રૂંધાઈ ગયા હતા. મૃતક હેમેન્દ્ર પરમાર ગોંડલના સ્ટેશન પ્લોટમાં આવેલી શિશુ મંદિર સ્કૂલમાં ધોરણ-૫માં અભ્યાસ કરતો હતો અને તે તેના માતા-પિતાનો એકનો એક પુત્ર હતો. જ્યારે મૃતક દર્શીત ચૌહાણ કોટડા સાંગાણીનો વતની હતો અને બે ભાઈઓમાં મોટો હતો, તેના પિતા શાપરમાં હાર્ડવેરની દુકાન ચલાવે છે.

પોલીસ અધિકારીની સમયસૂચકતા અને બચાવ કામગીરી

અકસ્માત થયો તે જ સમયે પાછળથી કોટડા સાંગાણી પોલીસ સ્ટેશનના એએસઆઈ (ASI) વિશાલ ગઢાધરા ગોંડલ તરફ જઈ રહ્યા હતા. તેમણે અકસ્માત જોતા જ તુરંત જ સ્થળ પર પહોંચીને ૧૦૮ એમ્બ્યુલન્સ અને ૧૧૨ નંબર પર કોલ કરીને ઇમરજન્સી મદદ મંગાવી હતી. અકસ્માત સર્જનાર કારમાં એક પરિવાર સવાર હતો, જેમાં બે મહિલાઓ પણ સામેલ હતી. કારની એરબેગ્સ સમયસર ખુલી જવાને કારણે કારમાં બેઠેલા પરિવારનો આબાદ બચાવ થયો હતો. અકસ્માત બાદ માનવતા દાખવીને તે પરિવારે અન્ય કાર બોલાવી હતી અને એક મહિલાએ મૃતક હેમેન્દ્રને ગોંડલની સિવિલ હોસ્પિટલ સુધી પહોંચાડ્યો હતો.

ઉચ્ચ પોલીસ અધિકારીઓ ઘટનાસ્થળે, કારચાલક સામે ગુનો દાખલ:

ઘટનાની ગંભીરતાને પગલે ગોંડલ ડિવિઝનના ડીવાયએસપી (DYSP) કે.જી. ઝાલા તથા કોટડા સાંગાણીના ઇન્ચાર્જ પીઆઈ (PI) એસ.આર. ગોહિલ સહિતનો મોટો પોલીસકાફલો તાત્કાલિક ઘટનાસ્થળે દોડી ગયો હતો. પોલીસે રોડ પર એકત્ર થયેલા ટોળાઓને હટાવી વાહનો દૂર કરી વાહનવ્યવહાર પૂર્વવત કરાવ્યો હતો. પોલીસે બંને કિશોરોના મૃતદેહોનો કબજો મેળવી પીએમ (પોસ્ટમોર્ટમ) અર્થે હોસ્પિટલ ખસેડ્યા હતા. મૃતક દર્શીતના પિતા રાજેશભાઈ મહેશભાઈ ચૌહાણની ફરિયાદના આધારે પોલીસે બ્રેઝા કારના ચાલકને રાઉન્ડઅપ કરી લીધો છે અને તેની વિરુદ્ધ ભારતીય નાગરિક સુરક્ષા સંહિતા (BNSS)ની કલમ ૨૮૧, ૧૦૬(૧) તથા મોટર વાહન અધિનિયમ હેઠળ ગુનો નોંધી આગળની કાયદેસરની તપાસ શરૂ કરી છે.
​​​​​​​

View this post on Instagram

A post shared by Aajkaal (@aajkaaldaily)