રાજકોટ ગ્રામ્ય એલસીબીની ટીમે ગોંડલના દેરડી કુંભાજી ગામ પાસેથી પશુધનની ચોરી કરનાર ટોળકીને ઝડપી દીધી હતી. પોલીસે અહીંથી પાંચ શખસોને ઝડપી લઇ તેમની પાસેથી બોલેરો અને મોબાઈલ ફોન સહિત ૩.૧૧ લાખનો મુદ્દામાલ કબજે કર્યેા હતો. આ શખસોની પૂછતાછ કરતા રાણસીકી ગામે થયેલી બે ભેંસ ચોરીનો ભેદ ઉકેલાઈ ગયો હતો. આ ટોળકીનો મુખ્ય સૂત્રધાર હજુ પોલીસને હાથ લાગ્યો ન હોય તેના પકડાયા બાદ આ ટોળકીએ અન્ય કયાં પશુધનની ચોરી કરી તેની માહિતી બહાર આવશે.
જાણવા મળતી વિગતો મુજબ, સુલતાનપુર પોલીસ સ્ટેશનમાં ખેડૂત દ્રારા ફરિયાદ નોંધાવવામાં આવી હતી કે, રાણસીકી ગામની સીમમાં આવેલા પોતાના ખેતરે તેણે બે ભેંસ બાંધી રાખી હોય જેની કોઈ શખસો ચોરી કરી ગયા હતા. જે અંગે પોલીસે ગુનો નોંધી જરી કાર્યવાહી કરી હતી.
બીજી તરફ આ બનાવવાને લઇ રાજકોટ ગ્રામ્ય એલસીબી પી.આઈ વી.વી.ઓડેદરા, પીઆઇ ડી.જી. બડવા અને પેરોલ ફર્લેા શાખાના પીઆઈ એસ.જે.રાણાના માર્ગદર્શન હેઠળ એલસીબીની અલગ–અલગ ટીમો બનાવી તપાસ હાથ ધરી હતી. દરમિયાન મળેલી હકીકતના આધારે દેરડી કુંભાજી ગામેથી પોલીસે પશુધનની ચોરી કરનાર આ ટોળકીને ઝડપી લીધી હતી.
ઝડપાયેલા શખસોમાં મહેશ ચનાભાઈ વડદોરિયા (ઉ.વ ૨૩ રહે. પાણીધ્રાના પાટીએ તા. માળીયાહાટીના)પ્રવીણ ઉર્ફે ફઝલ ચનાભાઈ વડદોરિયા (ઉ.વ ૨૩), ગોવિંદ ઉર્ફે ઢીંગો ચનાભાઈ વડદોરીયા(ઉ.વ ૨૧), અજય બદભાઈ વડદોરીયા(ઉ.વ ૨૨ રહે. ત્રણે દેરડી રોડ, જેતપુર) અને સંજય અમરશીભાઈ વાઘેલા (ઉ.વ ૨૫ રહે. દેરાળા હનુમાન ઢોરે તા. ગઢડા)નો સમાવેશ થાય છે. પોલીસે આ શખસો પાસેથી બોલેરો પીકઅપ વાહન અને ચાર મોબાઈલ ફોન સહિત ૩.૧૧ લાખનો મુદ્દામાલ કબજે કર્યેા હતો.
આ ટોળકીની પૂછતાછમાં તેમણે રાણસીકી ગામેથી બે ભેંસની ચોરી કરી હોવાની કબુલાત આપી હતી. આરોપીઓ બોલેરો લઈ સીમ વિસ્તારમાં આંટાફેરા કરતા હતા અને તક મળતા પશુધનની ચોરી કરી લેતા હોવાનું જણાવ્યું હતું.જો કે,આ ટોળકીમાં મુખ્ય સૂત્રધાર અન્ય શખસ હોય જે પોલીસને હાથ લાગ્યો ન હોય તેના ઝડપાયા બાદ આ ટોળકીએ અન્ય કોઈ સ્થળે પશુધનની ચોરી કરી છે કે કેમ? સહિતની વિગતો બહાર આવશે.