ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા ધોરણ 10 અને 12ના પરિણામો ગયા વર્ષની જેમ આ વર્ષે પણ વહેલા જાહેર કરવાના પ્રયાસો હાથ ધરવામાં આવ્યા છે. શિક્ષણ મંત્રી પ્રફુલ પાનસેરિયાના જણાવ્યા અનુસાર પરિણામો વહેલા આવે તે માટે બોર્ડ દ્વારા ઝડપી કામગીરી કરવામાં આવી રહી છે.

વિદ્યાર્થીઓ અને વાલીઓ માટે આ એક સારા સમાચાર છે, કારણ કે પરિણામો વહેલા જાહેર થવાથી તેમને આગળના અભ્યાસ માટેની તૈયારીઓ માટે વધુ સમય મળશે. બોર્ડ દ્વારા પરિણામોની જાહેરાતની સત્તાવાર તારીખ ટૂંક સમયમાં જાહેર કરવામાં આવશે.

મહત્વનું છે કે સામાન્ય રીતે બોર્ડની પરીક્ષા માર્ચ મહિનાના છેલ્લા અઠવાડિયા સુધી ચાલતી હોય છે, પરંતુ આ વર્ષે માર્ચના બીજા અઠવાડિયામાં બોર્ડની પરીક્ષા પૂર્ણ થઈ ગઈ હતી. વહેલી પરીક્ષા પૂર્ણ થવાથી રીઝલ્ટ પણ વહેલાં આવવાની શક્યતા છે. રીઝલ્ટ વહેલા જાહેર થાય તો ઉચ્ચ અભ્યાસમાં વિદ્યાર્થીઓએ જલદી પ્રવેશ મેળવી શકે. બોર્ડ દ્વારા આયોજનપૂર્વક જ પરીક્ષા વહેલી લેવામાં આવી હતી.

બોર્ડનો સ્ટાફ મહેનત કરી રહ્યો છે, પરિણામ વહેલાં આવશેઃ પ્રફુલ પાનસેરિયા

શિક્ષણમંત્રી પ્રફુલ પાનસેરિયાએ જણાવ્યું હતું કે ગત વર્ષે બોર્ડના સ્ટાફ દ્વારા મહેનત કરીને ધાર્યા કરતાં વહેલાં પરિણામ આપવામાં આવ્યાં હતાં. આ વર્ષે પણ બોર્ડનો સ્ટાફ મહેનત કરી રહ્યો છે, જેથી વહેલાં પરિણામ આવશે.