સોમવારે ઈતિહાસમાં પહેલીવાર 6 મહિલાઓએ એકસાથે સ્પેસની સફર કરી. જેમાં હોલીવુડની જાણીતી સિંગર કેટી પેરી અને અમેરિકન અબજોપતિ જેફ બેઝોસની મંગેતર લોરેન સાંચેઝ પણ સામેલ હતી.

આ મહિલાઓએ અમેરિકાના ઉદ્યોગપતિ જેફ બેઝોસની બ્લુ ઓરિજિન કંપનીના રોકેટથી આ યાત્રા કરી હતી. રોકેટે ટેક્સાસના વેન હોર્ન લોન્ચ પેડ પરથી સાંજે 7 વાગ્યે ઉડાન ભરી હતી. લગભગ 11 મિનિટ બાદ મિશન પરત ફર્યું હતું.

આ દરમિયાન રોકેટે 200 કિમીની સફર કરી હતી. 1963 બાદ અંતરિક્ષ યાત્રા પર જનારું આ પહેલું ઓલ વિમેન ક્રૂ છે. આ પહેલા 1963માં રશિયન એન્જિનિયર વેલેન્ટિના તેરેશકોવાએ એકલા અંતરિક્ષની યાત્રા કરી હતી.

11 મિનિટની સફર માટે 1.15 કરોડ ચૂકવ્યા

લગભગ 11 મિનિટની સફર માટે દરેક મહિલા યાત્રીએ 1.15 કરોડ રૂપિયા ભાડું ચૂકવ્યું છે. આ મિશન જેફ બેઝોસની બ્લુ ઓરિજિન કંપનીના ન્યૂ શેપર્ડ પ્રોગ્રામનો ભાગ છે, જેને NS-31 નામ આપવામાં આવ્યું છે.

કેટી પેરી અને લોરેન ઉપરાંત ટીવી પ્રેઝન્ટર ગેલ કિંગ, માનવાધિકાર કાર્યકર્તા અમાન્ડા ગુયેન, ફિલ્મ નિર્માતા કેરિયન ફ્લિન અને NASAની પૂર્વ રોકેટ વૈજ્ઞાનિક આઈશા બોવે પણ અંતરિક્ષની સફર પર ગઈ હતી.