ટાઇટેનિક જહાજ ડૂબી ગયાના 113 વર્ષ પછી સંશોધકોએ આખરે જહાજના પ્રથમ અધિકારી વિલિયમ મર્ડોકને ક્લીનચીટ આપી દીધી છે. અત્યાર સુધી ઓફિસર મર્ડોક પર તેમની જવાબદારી ન નિભાવવાનો આરોપ હતો. 10 એપ્રિલ 1912ના રોજ, ટાઇટેનિક ઇંગ્લેન્ડના સાઉથેંમ્પ્ટનથી ન્યૂયોર્ક જવા રવાના થયું હતું. તે 15 એપ્રિલના રોજ એટલાન્ટિક મહાસાગરમાં ડૂબી ગયું હતું, જેમાં અંદાજે 1517 લોકો માર્યા ગયા હતા.

અત્યાર સુધી એવો આરોપ હતો કે ટાઈટેનિક ડૂબી જવાની જવાબદારી મર્ડોકે લીધી ન હતી. ટાઇટેનિકના કાટમાળના થ્રી-ડી સ્કેનથી જાણવા મળ્યું કે મર્ડોક જવાબદારીથી ભાગ્યા ન હતા પરંતુ મુસાફરોને બચાવવાના પ્રયાસમાં મૃત્યુ પામ્યા હતા. ઊંડા સમુદ્ર સંશોધન અને મેપિંગ કુશળતા ધરાવતી અમેરિકન કંપની મેગેલને એટલાન્ટિક મહાસાગરમાં 12,500 ફૂટ નીચે ટાઈટેનિકના કાટમાળના 7.15 લાખ ફોટોગ્રાફ્સ કેપ્ચર કર્યા હતા અને તેના આધારે સંશોધકોએ અત્યાર સુધીનું સૌથી સચોટ 3-ડી સ્કેન રજૂ કર્યું. ટાઇટેનિકના વિશ્લેષક પાર્કેસ સ્ટીફન્સને કહ્યું કે આ વિશાળ ડિજિટલ મોડલ મર્ડોકની નિર્દોષતા સાબિત કરે છે.

ટાઈટેનિકના બચેલા મુસાફરોએ અહેવાલ આપ્યો કે તેઓએ એક અધિકારીને લાઈફ બોટ તરફ દોડતા બે માણસોને ગોળી મારતા જોયા. પછી તેણે પોતાની જાતને પણ ગોળી મારી. આ અધિકારીને મર્ડોક માનવામાં આવતો હતો. જેમ્સ કેમરનની ફિલ્મ 'ટાઈટેનિક'માં પણ આ જ વિચારનું પુનરાવર્તન થયું હતું.

થ્રી-ડી સ્કેનથી જાણવા મળ્યું કે ટાઈટેનિક ડૂબી રહ્યું હોવાથી મર્ડોક લાઈફબોટ લોન્ચ કરવાની તૈયારી કરી રહ્યા હતા. ક્રૂ મેમ્બરમાંના ર્ક ચાર્લ્સ લાઇટોલરે પણ કહ્યું હતું કે મર્ડોક મુસાફરોના જૂથને સલામતી તરફ લઈ જવાનો પ્રયાસ કરી રહ્યા હતા ત્યારે મોજાથી અથડાતાં તેમનું મોત થયું હતું.