દર મહિનાની પહેલી તારીખે સરકાર ઘણા નિયમોમાં ફેરફાર કરે છે. આ દિવસે ગેસ સિલિન્ડરથી લઈને પેટ્રોલ અને ડીઝલ સુધીની દરેક વસ્તુના ભાવ નક્કી કરવામાં આવે છે. આ ઉપરાંત, આજે એટલે કે 1 મેથી ઘણા નાણાકીય ફેરફારો થઈ રહ્યા છે, જેની સીધી અસર તમારા ખિસ્સા પર પડશે. દેશભરમાં સૌથી વધુ વપરાશમાં આવતા દૂધ અમૂલના દૂધ માટે પણ તમારે વધુ પૈસા ખર્ચવા પડી શકે છે.

અમૂલ દૂધમાં પ્રતિ લિટર બે રૂપિયાનો વધારો

મધર ડેરી અને વેર્કા બ્રાન્ડ્સ પછી, અમૂલે પણ દેશભરમાં દૂધના ભાવમાં પ્રતિ લિટર 2 રૂપિયાનો વધારો કર્યો છે. નવી કિંમતો આજથી અમલમાં આવ્યો છે. અમૂલ સ્ટાન્ડર્ડ, અમૂલ બફેલો મિલ્ક, અમૂલ ગોલ્ડ, અમૂલ સ્લિમ એન્ડ ટ્રીમ, અમૂલ ચાઈ માઝા, અમૂલ તાઝા અને અમૂલ ગાયના દૂધના ભાવમાં 2 રૂપિયાનો વધારો થયો છે.

ATMમાં પૈસા ઉપાડવા મોંઘા થયા

રિઝર્વ બેંક ઓફ ઈન્ડિયાના નવા નિર્દેશો અનુસાર, એટીએમમાંથી નિર્ધારિત મફત વ્યવહાર મર્યાદા પછી દરેક વધારાના વ્યવહાર માટેનો ચાર્જ 1 મે, 2025થી 21 રૂપિયાથી વધારીને 23 રૂપિયા કરવામાં આવ્યો છે. આ ફી નાણાકીય અને બિન-નાણાકીય બંને વ્યવહારો પર લાગુ થશે. ગ્રાહકોને મેટ્રો શહેરોમાં તેમની બેંકના એટીએમમાંથી ત્રણ મફત વ્યવહારો અને નોન-મેટ્રો વિસ્તારોમાં પાંચ મફત વ્યવહારો મળે છે.​​​​​​​

રેલેવ ટિકિટને લઈ ફેરફાર કરાયો

ભારતીય રેલ્વેએ ટિકિટ બુકિંગ પ્રક્રિયામાં મહત્વપૂર્ણ ફેરફારો કર્યા છે. હવે સ્લીપર અને એસી કોચમાં વેઇટિંગ ટિકિટ માન્ય રહેશે નહીં. વેઇટિંગ ટિકિટ પર મુસાફરી ફક્ત જનરલ કોચમાં જ શક્ય બનશે. આ ઉપરાંત, એડવાન્સ રિઝર્વેશનનો સમયગાળો ૧૨૦ દિવસથી ઘટાડીને ૬૦ દિવસ કરવામાં આવ્યો છે.

કોર્મશિયલ ગેસ સિલિન્ડરમાં 17 રૂપિયા ભાવ ઘટ્યો

દર મહિનાની પહેલી તારીખે એલપીજી સિલિન્ડરના ભાવની સમીક્ષા કરવામાં આવે છે. આજે કોમર્શિયલ ગેસ સિલિન્ડરના ભાવમાં 17 રૂપિયાનો ઘટાડો કરવામાં આવ્યો છે. જેના કારણે ગ્રાહકોના માસિક બજેટ પર થોડી રાહત મળી છે.

સીએનજી અને પીએનજીના ભાવને લઈ ફેરફાર થવાની શક્યતા

પેટ્રોલિયમ માર્કેટિંગ કંપનીઓ દર મહિનાની શરૂઆતમાં એર ટર્બાઇન ફ્યુઅલ, સીએનજી અને પીએનજીના દરોની સમીક્ષા કરે છે. આ ઇંધણના ભાવ ૧ મે, ૨૦૨૫થી બદલાય તેવી શક્યતા છે, જે પરિવહન અને ઘરેલું ઉપયોગને અસર કરી શકે છે.